Hmeichhe duhthusam mipa famkim chu

Hmeichhe hovin an mipa duhzawng tak an sawi a, heta ngaihdan lakkhawmah hian an mipa duhthusam chu kumkhatah cheng nuai 3 vel tal lalut an nih a ngaih bakah, 5ft 11 inches a sang an nih a ngai bawk a. Hei mai hi a la ni lo cheu, hetianga mipa duhthusam hian car changkang tak mai a neih tel a ngai bawk.
UKDating.com chuan hmeichhe 83,000 rual zette ngaihdan a lakhawm a, he ngaihdan lakkhawm atanga an chhanna tam berte chu mi pakhatah an chantir chhin a. A chunga tarlan tak khi British hmeichheho chuan an mipa duhthusam chu a ni.
Heng hmeichheho chhanna en hian an mipa duh chu lehkha pawh zir sang ve pangngai tak, a lo berah graduate chin tal an nih a ngai a. Incheina lamah pawh ti mai mai lo, smart taka inchei thin an duh tel bawk.
He ngaihdan lakkhawmah hian hmeichheho duhthusam ni tur chuan hmelthat em em pawh a pawimawh chuang lo a. Hetiang mipa hi kg 76 bawr vel a nih a ngai bawk a.
Mahni invawng fel thei tak, meizial zuk leh drugs vel tih aia gym kal ngaina mi nih a ngai bawk a. Heng hmeichhe zinga 98% ngawt chuan finna lamah pawh mi pangngai aia sang ngat an duh a ni.
Heng mipa hian wine lampang bakah ran vulh chungchang pawh an hriat a ngai a. Hmuihmul zuah, sam sei leh pa tawi deuhte chu an duh thak lo.
Hemi zirchiannaa hma latu ber, David Brown chuan, “Tunlai khawvelah hian a hma zawng aiin sum hi a pawimawh lehzual tawh a. Hmeichhe maltlat zawng zawngte hian an duhthusam anga awm theih an tum vek tawh a tih theih,” a ti a.
“Hetianga hmeichhe tlahlang te hian an duhthusam anga awm tur chuan mipa hlawh sang tak, khawsak lamah pawh nuamsa ve tak an duh phah a ni,” a ti bawk.

Sex ah thlarau mi an sang duh

Tunhnaia mithiamin an zirnaah chuan thlarau mi tak mai te hian mipat hmeichhiatna an hmang nasa bik niin an sawi a. Hetianga thlarau mi zingah pawh hian hmeichhe lam an ni duh bik tih an sawi bawk.
University of Kentucky mithiamte’n an zirnaah hian thalai zingah ruihtheih thil vang emaw, ngaihtuah lawk lem lo chung emaw, sakhaw thil emaw avanga mipat hmeichhiatna hmang ai mahin thlarau mi nih avanga hetiang lama inhmang hi an sang duh zawk an ti.
Hemi zirchianna kawnga hma latu ber, Jessica Burris chuan, “Sakhaw lama inhman leh thlarau mi nih hi kan nitin nunah a pawimawh tih hi chu mitinin rei tak chu kan lo hre tawh,” a ti a.
“Chiang lehzuala han zir takah chuan thlarau chenchilh hian danglamna tam tak chu a lo nei chiang hle a. Hei hi kawng khat chauh a ni mai lo a, kawng hrang hrangah a ni lehnghal,” a ti bawk.
An zirchiannaah hian tehna chikhat, ‘Spiritual Transcendence Scale’ an tih chu an hmang a, an chhutnaah chuan inpawhtawnna (connectedness), mi zawng zawng huap zo (universality) leh tawngtai hlawhtlinna (prayer fulfillment) te chu a bulpui pawimawh tak an ni a.
Heng thil pathum zingah hian inpawhtawnna ber hian mipat hmeichhiatna lam kawng chu a kawk tih thu sawiin, thlarau lama itna insiam chuan mi hrang hrang nena mipat hmeichhiatna hman kawngah a hruailut a. Heng mite hian a tlangpuiin mipat hmeichhiatna an hman hian condom an hmang ngai lem lo niin an sawi bawk.
He thil an zirna lamah hian university zirlai, undergraduate 353 te chu zawhna zawtin an kawm chiang a, heng zinga 61% te chu hmeichhia an ni nghe nghe a. An zawhnaah chuan ruihtheih thil tih thin dan te, rilru thawh thut ang anga chet thin dan te, sakhaw ngaihsak dan te, thlarau lam ngaihtuah dan te leh mipat hmeichhiatna an hman dante a tel a.
Thlarau nun lama an chhanna tam zawkah chuan an tawngtai emaw, fianrial hun an hman emaw hian inpumkhatna rilru an pu tlangpui niin an tarlang a. Mimal taka inpawh chu thil harsa niin lang mahse, a nawlpui nena inhawng taka inpawh duhna an nei ta thin niin an tarlang bawk.
Hetianga rilru lama inpawhna tha tak nei vek tura ngaihtuahna an put vang hian mipat hmeichhiatna lam pawh zalen takin an hmang ta mai thin a. Hei hi sualah pawh an ngai lem lo a, thil pangngai ve tak ni maiin an ngai tawh a ni.

Guitar zut nalh ber Jimi Hendrix

Kum 40 chuang a ral tawh a, guitarist ropui tak tak an chhuak hnem tawh hle a, heti chung hian ‘Guitar Lalpa’ ti hiala hriat Jimi Hendrix chu guitar zut nalh berah an la thlang ta cheu a. Amah ber hian fam chang tawh mahse tunhnai khan musician rualte chuan 1970 vela Jimi Hendrix hla ‘Voodoo Child (Slight Return) a guitar zut chu tun thlenga guitar zut mawi berah an thlang. Voodoo Child hian Guns N’ Roses hla ‘Sweet Child O’ Mine’ chu a khum a, Slash-a guitar zut hi pahnihnaah a awm a. Kum 5 kalta khan Total Guitar magazine chuan hetiang hi an thlang a, hemi tum hian ‘Sweet Child O’ Mine’ hi pakhatna a ni thung. Tun tumah hian musician website MusicRadar.com chuan guitar zut nalh ber thlanna hi an buatsaih a. Khawvel hmun hrang hranga musician rualte chuan vote hi an thlak a, Jimi Hendrix hi a chungnung ber a ni. Top 20 an thlanchhuah zingah hian Michael Jackson-a hla ‘Beat It’ pawh 20 naah a lang a, he hlaah hian Van Halen guitarist Eddie Van Halen chuan a zut a ni. Pakhatna dinhmun hauhtu Voodoo Child bul tan nan hian Hendrix chuan ‘wah-wah’ effect a hmang a, a hmaa Jimi Hendrix-a hla ‘Voodoo Chile’ tih chhunzawmna niin, a album ‘Electric Ladyland’ ah a telh a. 1970 khan single angin a tichhuak a, a hnu chuan a hming pawh hi Voodoo Chile tiin a thlak ve leh a ni. Guitar zut nalh thlanchhuah zingah hian hranghlui lam an lang hnem hle a, tunhnua mi chu pahnih chauh an lang a tih theih a. The White Stripes guitarist Jack White leh Muse guitarist Matt Bellamy te bak chu tunhma lam chhuak vek an ni. MusicRadar.com tlawhtu mi 5,000 chuangin vote an thlak atanga a lan dan chuan 2009 ah pawh tunhmaa rock music khan rimawi ngainatute a la hneh ber a tih theih.
Top 20 :
1. The Jimi Hendrix Experience - Voodoo Child (Slight Return)
2. Guns N' Roses - Sweet Child O' Mine
3. Led Zeppelin - Whole Lotta Love
4. Deep Purple - Smoke On The Water
5. Derek and the Dominos - Layla
6. AC/DC - Back In Black
7. Metallica - Enter Sandman
8. The Beatles - Day Tripper
9. Nirvana - Smells Like Teen Spirit
10. The Rolling Stones - (I Can't Get No) Satisfaction
11. Black Sabbath - Paranoid
12. Muse - Plug In Baby
13. Eddie Van Halen - Ain't Talkin' 'Bout Love
14. The Kinks - You Really Got Me
15. The White Stripes - Seven Nation Army
16. AC/DC - Highway to Hell
17. Led Zeppelin - Heartbreaker
18. Black Sabbath - Iron Man
19. Led Zeppelin - Black Dog
20. Michael Jackson - Beat It

Football hlapui - "You'll never walk alone"

English Premier League en thangte zingah chuan hre lo an awm lo ang tih theih, Liverpool FC hlapui ‘You’ll Never Walk Alone’ hian chanchin a ngah phian mai a. He hla hi football kaihhnawih thilah chuan khawvel hmun hrang hranga sak hlawh ber a ni a, thenkhat phei chuan ‘Football khawvela tawngtaina hla’ ti hialin an sawi a. A chanchin hi chiang zawkin belchiang ila.
He hla ‘You’ll never walk alone’ tih hi musical pakhat, ‘Carousel’ tiha telh tura Richard Rodgers leh Oscar Hammerstein II te phuah a ni a. ‘Carousel’ hi Ferenc Molnar-a’n lemchan pakhat a phuah ‘Liliom’ tih atanga lakchhawn a ni.
‘You’ll never walk alone’ awmna lemchan ‘Carousel’ hi April 19, 1945 khan Broadway ah an hawng a, vawi 890 ngawt an entir nghe nghe a. He lemchanah hian a changtunu Julie Jordan-i cousin Nettie Fowler chuan ‘You’ll never walk alone’ tih hla hi Julie te nupa thlamuan nan leh Julie pasal Billy Bigelow-a’n ruk ruk a tumna a tlawlh avanga intihhlum a tum laia Julie fuih nan a hmang a ni.
He lemchan tawp dawna an fanu Louise-i’n a lehkha zir lai tha taka a zawh avanga fuihna atan leh an nufaa a hmangaihzia lantir nan a pa Billy chuan a rawn sa ve leh bawk.
Liverpool khaw band, rock and roll group ‘Gerry & the Pacemakers’ khaipa ber Gerry Mardsen chuan he hla hi nalh a ti em em mai a, a band member te hnenah chuan sak ngei a duh thu a sawi a. An han sak chhoh takah chuan hriat an hlawh phah ta hle a.
Hetianga Liverpool khawpuia a lar chhoh takah chuan Liverpool Football Club pawhin a thluk chu an hmang phawt a, a hnulamah a hla thu pawh chu an chhawm zui ta zel a. A tawpah phei chuan a hla thupui hi an club chhinchhiahnaah hial an telh zui a, tun thlengin an la hman chhunzawm phah a ni.
1963 khan khatih laia Liverpool manager Bill Shankly chu Gerry Marsden chuan ‘You’ll never walk alone’ tih hla an thun fel vek tawh chu a pe a. Shankly chuan a duh em em a, football chanchin ziaktute chuan an hre ve leh a, Liverpool FC chuan Gerry Marsden-a hla hi an club hlapuiah an hmang dawn tih chu mi hriatah an puang ta a ni.
Tunah chuan Liverpool mai pawh ni lo, khawvel hmun hrang hranga club te chuan he hla hi an chham rual dual dual tawh mai a. Football ngaina tak tak inti te zingah chuan hre lo an awm lo ang tih theih a, football khawvelah chuan he hla aia sak hlawh hi a awm chuang lo.
He hla lo sa tawh hi an thahnem hle mai a, heng zinga a langsar zual thenkhatte chu :
1. Gerry & the Pacemakers :
Gerry & the Pacemakers in an sak hi hriat hlawh leh lar ber chu a ni a, khawvel hmun hrang hranga football stadium chhunga ri thin chu anni sak hi a ni.
2. Die Toten Hosen :
German rock band Die Toten Hosen hian an ram chhunga football fans te tan he hla hi an sa a, football hmunpuiah chuan anni sak hi a ri reng mai a ni.
3. The Three Tenors :
The Three Tenors an tih thin, classical lama miropui - Plácido Domingo, José Carreras leh Luciano Pavarotti te chuan a dan dang deuhin he hla hi an vawrh ve leh a ni.
4. Tom Jones :
‘The Tiger’ an tih, Tom Jones chuan soul music lam hawiin a sa a, hriat pawh a hlawh lehzual phian.
5. Jordin Sparks :
‘American Idol’ hian a dinhmun ropui tak thlenna kawngah he hla hi fuh em emin a vawrhchhuak a, a dinhmun siamtu pakhat niin an sawi.
6. Renée Fleming :
Renée Fleming chuan US president Barack Obama lawmna ‘The Obama Inaugural Celebration Concert’ ah he hla hi a sa a, lawm a hlawh hle.
7. Elvis Presley :
‘The King’ chuan ama style pangngaiin he hla hi a sa a, he hla sa tawh zawng zawng zingah chuan a thlawh fuh ber pawla sawi a ni.
8. Celtic FC supporters :
Celtic FC fans te chuan 2004 UEFA Cup a FC Barcelona nen an inkhelh dawn tuma firfiak hovin fans kalkhawm an thahte hriatreng nan an sa a, mi thinlung a hneh dan a danglam hle.
9. Danielle & Jeri :
English hmeichhe pahnih Danielle leh Jeri te hian rui deuh chungin Karaoke khawl hmaah he hla hi an sa a, hei hi YouTube ah an dah a, lawm a hlawh phian.
10. Liverpool FC fans :
Sawi tam a ngai lo, Anfield Road, Liverpool ah chuan hei baka hla ropui hi a awm thei tawh lo.

2012 ah khawvel a tawp dawn lo

Mayan Calendar en thiamte’n December ni 21, 2012 ah khawvel a tawp dawn an ti niin sawi a tam hle a. Khawvel hmun hrang hrangah he thu hi buaipuitu an tamin, chi-ai phah tawkte pawh an Thahnem hle a. Mizoramah ngei pawh he chanchin hian ngaihven a hlawh a, buaipuitu an tam chho hle bawk a. Tunhnai khan Mayan pa upa lam pakhat, Apolinario Chile Pixtun chuan hei hi a dik loh thu a sawi bakah, heti taka sawi a hlawh mai hi ninawm a tih thu a sawi ve tlat.
Chile Pixtun chuan khawvel tawp hun tur chungchang hi chu Mayan ngaihdan ni lovin, khawthlang lam mite Tan chhuah a nih thu a sawi a. 2012 ah chuan khawvelah thil danglam chu a thleng dawn nia an ngaih thu sawiin vansang lamah pawh thil chhinchhiahtlak tak a awm dawn tih chu Mayan ho chuan an rin thu a sawi bawk a. Hetiang a nih avang hian khawvel a tawp dawn nia ngaihna erawh an neih ngai loh thu a sawi.
A sawi zelnaah chuan hetiang ngaihdan hi 1960 bawr vel daih aTanga inTan tawh a nih thu te, a bul ber chu ‘Monument Six’ a nih thu te a sawi a. ‘Monument Six’ hi lung phek, thil inziah Teuhna, a inziak erawh hrilhfiah thiam har tak a ni a. An hriatthiam theih lai Thenkhatah chuan 2012 ah hian Mayan pathian pakhat, indona leh bul Tantu pathian Bolon Yokte kaihhnawih thil, eng emaw lian tham tak a thleng dawn niin a inziak niin Chile Pixtun chuan a sawi.
Mayan ho hi 300 A.D. aTanga 900 A.D. inkar vel khan an vanglai tak a ni a. An thiamna a sang a, vansang lam an hre bel em em mai a. Tunlaia titi titamtu ber Mayan Calendar pawh hi kan calendar hman Thin (Greco-Roman Calendar) ai chuan a rintlak zawk hle niin mithiamte chuan an sawi.
Mayan Calendar hi 3,114 B.C aTang khan a inTan a, hun inThen dan pawh a danglam hle a. Kum 394 dan zelah a inThen hlawm a, hetiang hun khat zel hi ‘Baktun’ an ti a. 13 hi Mayan ho nambar serh a ni a, Baktun 13-na chu December ni 21, 2012 hian a tawp dawn a, hei hi Thenkhatin an lo sawi kawi deuh a, khawvel tawp hun tur angin an sawi niin a lang.
Hrilhlawktu ropui bera chhal Nostradamus pawh khan khawvel tawp hun tur tak chu sawi lo mahse 2012 hnulamah hian thil a la hrilhlawk hnem hle a. Hei hian Mayan Calendar behchhana khawvel tawp tur anga sawi hi a rawn kalh ve leh bawk a. Nostradamus khan a hrilhlawkna hi 3797 thleng daih a nih thu a ziak a, heti a nih chuan khawvel chu a la tawp mai dawn lo niin a ngaih theih.
Hetiang hrilhlawkna zawng zawng hi ngaih thutak chi a ni lo hle a, amah Nostradamus-a ngei pawh hian thil dik lo tak tak a sawi ve fo reng a. A hrilhlawkna pakhat chuan 1999 ah khawvel a tawp dawn ni angin a kawk a, tun thlengin a la tawp lo chu ania.
He hrilhlawknaah hian “Kum 1999, thla sarihnaah (July, 1999) ah van aTangin Lal ropui leh hlauhawm tak a rawn kal ang” tiin a sawi a, hetianga sawi tur hi a awm ta lo.
Nostradamus Code zirchiangtute chuan he hrilhlawktu ropuiin a lo ziah dan chuan 2009 leh 2012 inkar chhung hian khawvel hmun hrang hrangah buaina lian tak, indona, beidawnna leh sualna a nasa hle dawn a. Hetih rual hian hemi hun chhung hi beiseina leh thutiam Tha tak inTanna tur angin a ziak tel bawk.
2012 chungchangah hian hrilhlawkna chi hrang hrang a awm nual a, hengte hi rintlak em em an nih hmel loh hlawm hle a. |henkhat chuan Sony Pictures in ‘2012’ tih film an siam tur tihlarna atan hetiang thu hi a darh ta hluai niin an sawi a. He film hi hralh a kal theih zawk nan mi rilru an kai peng mai niin an ngai.
Kum 2000 pawh kha khawvel tawp hun tur angin an sawi nasa hman hle a, History Channel ah te hial an tilang nasa hle a, mahse eng teh ual chu a thleng ta chuang lo a. Mi Thenkhatin sum tam tak an siam theih nan midangte rilru-ah hlauhna an tuh kual vel mai mai niin a lang a. Hetiang thawm hi an vaw vul chuk a, lehkhabu leh TV hmangin sum siamna atan an lo hmang hmiah zel mai a. 2012 chungchang pawh hi hetiang deuh bawk hi niin a ngaih theih.

Setana biakna, kan ram leh kohhran

Kum 1966 khan mi pakhat, Anton S. LaVey chuan United States ah Setana biakna hi a ching chhuak tan a. A tir takah chuan pawl pakhat 'Magic Circle' tih chu San Francisco, California ah a tan a, he pawla telte chuan mihring sa an ei thin a. Maksak taka an chet thin avangin an pawl chu a lar chak hle a, 'Setana Kohhran' chu a ding tan a ni ta mai a, mi 10,000 vel lai an tel nghal a. Hetih lai vel hi chuan U.S. Constitution chuan 'Church of Satan' hi sakhaw chikhatah a pawm mai a. He pawl vanga sualna pung nasa lutuk vangin USA a State 24 zeta thuneitute chuan Bill of Rights an duan phah hial a. Setana betute hian saruakna, hurherhna, mahni anpui nena inpawlte bakah mihring leh ran nghaisak lam an ti nasa hle. Thalai lamin an intihhmuh chho a, an thalai pui, thian nei vak lo te, mahni inkiltawih chi te chu an thur chhuak a, Setana biakna lamah hian an hruailut ta thin a. Setana be thinte chu an zirlaiah an tlahniam nasa a, chhan awm lem lova thinrim vak te an ching a, an sam an dum nasa a, an mit veilam chungah an sam an titla chham thin a (Emo style angin), rilru hnual chang an ngah a, thil an ziak nasa a, thihna hi an ngaihven hle a ni. 1960 hmalam kha chuan Setana betu chu awm ve bawk mahse a langin an che ngam lo a. British Witchcraft Act 1735 chuan Britain chhunga dawi lam tih a khap bur mai a, he dan hi 1951 khan an hlip a, Anton S. LaVey chuan langsar zawkin bul a rawn tan tha ta chiah a ni.
Setana betu chihnih :
Setana betu hi chihnih a awm a, Theistic Satanism leh Atheistic Satanism te an ni a. Theistic Satanist te chuan Setana chu thil engkim ti thei, fel leh tha em em niin an ngai a. Atheistic Satanist te hi Setana awm ring lotu an ni a, Setana chu thil awm tak tak lo, mihring mize chikhat entirna ang chauhin an ngai thung a. Heng bakah hian sawi ve tur ting chuan Temple of Set leh Symbolic Satanism te pawh a awm bawk.
Theistic Satanism :
Theistic Satanism (Spiritual/Traditional Satanism an tih bawk) ah hi chuan Setana hi pathian ropui ber, engkim ti thei, thil engkim siamtu niin an ring a. Dawi lampang te, rilru kal dingtir te, mahni intihlen zel te chu an kal dan a ni.
LaVeyan Satanism :
Anton Szandor LaVey kohhran dinah hian mahni intuituah, mahni hmasial te, phuba lak te an inzirtir ber a. Anni hi Atheistic Satanist huanga awm niin, Setana chu awm tak tak lo, mihring mize awmsa entirna ang chauhah an ngai a ni. Anni hian an thiante chu an duat viau laiin midangte chu tihnat an hreh lo hle a, an duhna tihpuitlin zel an tum thin a, heng an thil duhte hi a tha lam sawi tur a awm lo hle. Setana biakna lama an tum ber chu Pathian duh dan ang zawng zawng kalha chet a ni ber a. Setana chuan a chhia leh bawlhhlawh apiang a lawm bawk a, amah zuitute pawhin hetiang zawnga inhman hi an tum ber bawk a. Midangin an tuar dawn a nih pawhin anmahniin nuam an tih miau chuan midangte ngaihdante chu an dah bo hmiah mai a ni. Khawtlangin thaa an ngaih hi an tan chuan thil tha lo a ni thung a, midangte chunga that chhuah chu thil tha lo berte zingah an ngai thin. Mi pawi khawih chu an tum ber a nih avangin naupang leh puitling nghaisak lamah an tuan tan a, hetiang tih chingte hi thuneitu lam chuan an man khawm a, an tihlum zel mai a ni. Setana betute hian mihring leh ran nghaisak te, pawngsual te, mihring leh ran hmanga inthawina te leh nung chunga inphumte hi an uar hle a. Tlema naupang deuhte chuan an chunga thleng ang chu naupang dang emaw, ran chungah emaw an ti ve leh chhawng thin a. Mipat hmeichhiatna an hman bakah mahni taksaa ser (Tattoo) siamte an uar hle a. Hetianga tattoo ziah hi Bible chuan a phal loh thu a tarlang chiang hle a, Leviticus 19:28 ah 'in intial tur a ni hek lo' tih a awm. Rom 16:17-18 ah chuan hetianga rinna kaipeng thei zawnga inzirtirna laka fimkhur tura chahna leh, Setana duh dana awmte chungchang chiang takin a inziak a. Chang 18 ah chuan 'Chutiang mite chuan kan Lalpa Krista rawng an bawl lo a, anmahni pum rawng an bawl zawk thin a; an kam that leh an kam thiamin mi fing lote rilru an bum thin' tiin a inziak a ni. Thupuan 3:21 ah Pathian tana rinawmte dinhmun tur chiang takin a inziak a, 'A hnehtu apiang ka lalthutphahah ka hnenah ka thuttir ang. Kei pawhin ka hneh a, ka Pa hnena a lalthutphaha ka thu ang khan' tiin a inziak.
Kan ram lamah :
Kan ram hi sap nun dan la nasa tak mai kan ni a, an khawsak dan kan lak zingah hian a tha lam aiin a tha lo lam hi a tam zawk a. Setana biakna lam pawh hi engtik atang emaw khan kan senglut ve ta reng a. Thil hre ziktluak tak tak si lovin, chhumbung deuhin kan hria a, a that lohna leh a hlauhawmna lai ngaihtuah lovin kan ti ve leh mai zel a ni. Kan ramah Setana biakna lama inhmang hi sawi tur an awm ve ta teuh mai a, heng mite hi belhchian chuan an hlim ngai lo a, nun nuamin an awm ngai hek lo. Anmahnia thawhtirtu tih ang angin an awm a, mahni thu pawhin an nung thei tawh lo a. Eng emaw chen chu an duhzawng, ruihtheih thil nei thei thin mahse rei a daih lo a, a hnuah chuan hrehawm takin an tawp mai thin. Hmanni lawk pawh khan Aizawl tlangval pakhat, tunhma deuha Setana be thin chu a inawkhlum a. Ani lo pawh hi tawpna rapthlak tak tak sawi tur chu an awm bawk a. Hei hian Setana biak hian hlimna tluantling leh vanneihna a thlen lohzia a tilang chiang hle. Tunlaia heti tak maia kan thalaite zingah Setana biakna a hluar ta mai hi eng nge a chhan ni ang le ? Kohhran tinte pawh hi kan beram rualte theuh kan enkawl danah kan inngaihtuah let te pawh a tul viau tawh lo maw ? Thlarau sual hian rawngbawltu der leh tak hi an hai lo a, i nun kha Lalpa rawngbawltu i nih chuan uluk hle rawh. Tin, Setana biaknaa inhnamhnawih tawhte hian nun simin nun thar Krista ah nei thin mahse, an nunhlui hian a umzui zel avang leh an taksaa tawrhna nasa tak an neih fo avangin an nun ngaiah an kir leh fo thin a. Hei vang hian tih ve chhin loh hi a tha ber a. A ti tawhte leh a bawiha tangte pawh hi an duh hun hunah an chhuak thei lo mai ni lovin, an thil tih hian thatna lam kawng an zawh hnu pawhin a umzui tlat zel avangin hetiang lama inhmangte hi chu thlahthlam lova venpui zel an ngai hle.
Biak in suasam hi :
Tunhnai maiah biak in pakhat suasam a ni a, a hma deuh pawhin sawi tur a awm tawh bawk a. Mak em em mai chu engatinge kan biak in thianghlim meuh pawh zahpah miah lova sual hian a luhkhung ngam tak mai le ? A hmaa kan sawi tawh ang khan Setana betute hian anmahnia a ‘tirtu’ an hlauh avangin loh theih lohin an suasam ta pawh ni se, sual hnathawh dang vang hrim hrim pawhin suasam theih tho chu a ni ngei mai. Mahse, heti zawng hian in ngaihtuah dawn teh ang.
Kohhrante hi kan harh a ngai a ni :
He thu hi chu sakhaw la run leh kohhran hi Pathian ang maia ngaitute tan chuan a nain an helh ngei ang. Mahse, sawi a tul tlat si a ni. Dik tak chuan eng kohhran mai pawh (Kohhran te lutuk tiam lovin) hian biak in kan sak hian a satu tur atan hnamdang (vai) kan ruai tlangpui a. Mizo thalaite cement mistiri leh hnathawk peih kan awm loh vang leh hna kan thiam loh zawk vang ni maw ? Tichuan, Kristian pawh ni hlei lo ten kan Pathian biakna tur chu an han sa ta a. A len tham avang leh sak chhungte a rei thin avangin hmun thenkhatah phei chuan mistiri te chen nan pindan (room) lian vak lo an siam a. Tichuan, kan biak in sa chung reng khan an pindanah khan an pathian hnenah te inthawiin an pathian an lo be ve reng thei a ni. Chu mai ni lovin, kan hriatpui loh tur leh kan hmuhpui loh hian an pathian sign/symbol te pawh kan biak inah hian an lo phum ru reng thei bawk a. Tin, an sak pahin hla (Pathian fakna ni lo) sain, Kristiante duh lohna thu te hi an sawi lo ang tih tunge sawi thei ? Kan Pathian biak in hi an pathian tante pawh an lo hlan reng thei bawk a. Kohhran tinte kan harh a hunin kan fimkhur a pawimawh tak zet a ni. Biak in thenkhatah chuan a biak in bel ni lo, a building tho si ah te dawr a awm thliah thluah a. Heng dawrah te pawh hian thil chi hrang hrang - computer, mobile phone te leh thil dang tam tak a awm a. Entir nan, khawi dawr berah emaw khan blue film te lo awm ta se, (e.g. computer, mobile phone, internet, CD ah te) sual tan chuan a zuamawm mai ni lovin, a hlauh loh tur zia mai chu!!! Tin, dawr nghaktu pawh nula/tlangvalte lo ni ta se, an bialnu/bialpa te nen chance neih nan pawh an lo hmang palh thei bawk a, fimkhur a tulin ngaihtuah that a va hun ta em!!! Thliar sin peih min ti viau maithei a; mahse, sual luhna leh sual kalkawng leh sual inrawlhna hi chu thil te tham tak nia kan ngaih ah pawh hian a ni thei zel a. Chu vang tak chuan kan fimkhur chu a tul tak meuh a ni. Bible pawhin ‘Hmun thianghlim min siamsak rawh se, an zinga ka chen ve theih nan’ a tih kha. Chuti a nih si chuan heti tak maia kan Pathian biak in pawh sualin a hlau lo leh a luhkhung ngam ta mai hi ‘a titute’ hi dem mai lovin kohhrante pawh hi i inenlet ngam ang u. ‘Biak in lai chauh’ vawng thianghlima, a building dang kan vawng thianghlim leh si lo a nih chuan Lal Isua pawh khan biak in kha a thianfaiin thil tam tak a thehchhuak a ni lo’m ni ? Kohhran sum hnar nia kan ngaih mek lai hian a lehlamah chuan sual tan chetna tur hmun kan siam tel zel tho thei a ni tih hriain i fimkhur thar ang u. Kristian 100% tia inchhal ngam State ah hian Setana betu intite hi an la tlem em mai. Ruihhlo bawiha tangte pawh a tlem zawk an ni lo’m ni ? Chuvangin, Lalpa tan hian i tang thar leh teh ang u. Kan Pathian hi Pathian thikthu chhia, ti kher kher a ni si a. Tawngkaa ‘tak’ hi a tawk lo a, ‘thu sawi huai’ ai chuan ‘huai taka Pathian thu nunpui ngam’ kan mamawh tawh zawk a ni lo maw ? Eng nge i thlir ve dan le ?

Rock Music History

Rock music hi rimawi chikhat, lar chak tak mai, 1960 vel bawr atanga thawm rawn nei lian tan a ni a. A bul tak chu 1940 leh 1950 vel khan rock and roll, rhythm and blues, country music, folk music, jazz leh classical music kaihkawp atangin a intan tawh a ni. Rock music hi guitar ri leh bass guitar, drums leh keyboard inpawlh khawm mawi tak hmanga siam a ni a. 1960 leh 1970 tirlam khan rock music ri mawi danglam tak a rawn chhuak tan a, hemi atang hian rock hnuaiah chi hrang hrang a rawn piang chak hle a. 1970 hnulam khan soft rock, glam rock, heavy metal, hard rock, progressive rock leh punk rock te chu a piang a. 1980 hnulamah new wave, hardcore punk leh alternative rock te a rawn piang ve leh a. 1990 hnulam khan grunge, Britpop, indie rock leh nu metal te a pian belh ve leh bawk a. Rock band emaw, rock group ah emaw chuan a lo berah mi pali an ni thin a. Lead guitarist, bass guitarist, lead singer leh drummer te chu rock band tikimtu an ni a. Group thenkhatah chuan an lead singer hian lead guitar emaw, bass guitar emaw an perh tel thin a, hengah hi chuan mi pathum chauhte pawh an ni thin.
A bul atangin (1940s-1960s) :
1940s vel khan khatih laia rimawi lar country leh blues te chu electric guitar leh drums nen an pawlh chho a, rock music bulpui chu a rawn intan a. 1950s velah Chuck Berry a rawn lar chho a, ‘60s rawn inher chhoh chuan Chuck Berry ngaisangtute zinga mi Rolling Stones chuan rimawi chi thar hmangin khawvel an rawn tuam tan a. A hmaa mimal hming lar viau thin kha Rolling Stones hian rawn thlakin band chu mi thinlungah a tlak nat phah hle a ni.
Rock Music darh chho (1970s) :
Rock music chuan rimawi ngainatute thinlung a luah hneh tawh hle a, hetiang taka mi a hneh avang hian band pawh an pung chak hle mai a. 1970s chho khan Led Zeppelin an rawn inlar a, a hmaa rock music kalphung kha rawn thlak danglamin hard rock leh heavy metal hmangin ram an rawn la tan a. Hetih lai vel tho hian Pink Floyd chuan rock music chidang leh, psychedelic rock chu khawvel hmaah an rawn phochhuak ve bawk a. 1970s chho ah hian ‘hippie band’ an tih mai Pink Floyd tih vel rawn khing turin Sex Pistols leh Clash te chu rawn dingin rimawi ring deuh mai, midangte na taka nawr thei hla thu nen punk rock bul an rawn tan ve leh a. Hard rock, psychedelic rock leh punk rock te hian kalphung bik an nei theuh a, an hlawhtling hlawm viau mai a. Anni bakah hian Pere Ubu leh midangte chuan tlema danglam leh deuh, industrial rock an rawn tan thar ve leh bawk a. Industrial rock hi chu a dang angin lar hluai lo mahse an kal chho ve reng a. Rock ngainatute chuan Deep Purple, Led Zeppelin, Black Sabbath leh Judas Priest chu an atchilh nghet tlat tawh mai a ni.
Rock Music a inthensawm (1980s) :
1980s a rawn inher chhuak a, rock kalphung pangngai chu a rawn danglam leh ta a. Punk rock kalpuitute pawnlam lan dan leh industrial rock zawmtute hmanrua kaikawpin English band Depeche Mode te chuan rock music dang, new wave an rawn chhuahpui ve tan a. American band R.E.M. chuan punk music hrul deuh si, rock band pangngai kalphung zawm tel siin rimawi chithar an rawn chhawp chhuak ve leh a. Anni hi college radio station velah an lar em avangin college rock an tih phah a ni. 1980s tawplamah chuan alternative rock in rimawi khawvelah hmun a luah nasa hle a. 1988 khan Billboard chuan alternative rock tan bik hian chart thar a siam a, an sawi chhuah lehna ah chuan modern rock tiin a hming hi an phuah zui a. 1980s ah hian kan ramah pawh kan lo hmelhriat em em, heavy metal chu a rawn lar hle mai a. British band Iron Maiden leh Def Leppard te chuan rimawi danglam tak mai hmangin rimawi ngainatute an rawn run a. Van Halen, Metallica, Megadeth te chu hahipa sawi an ni a. Glam metal (1980s) : 1980s ah hian rock danglam leh mi hip na tak glam metal an tih mai chu a rawn piang a. Rock music style dik tak leh glam look an tih mai chu rawn chawhpawlhin Queen, Sweet leh New York Dolls te kalphung an rawn zawmkhawm a, an lar chak hle. Motley Crue, Ratt, Quiet Riot, Guns N’ Roses, Warrant, Poison, L.A. Guns, Faster Pussycat, Twister Sister leh band dang tam tak te chuan 1987 vel atangin thawm an rawn nei lian hle a. Heng band te hian an music kalphung tha tak mai an larpui bakah, an hmel lan dante chu an hmaa mite ang lo deuhin an rawn siam a. Sam sei tak, thenkhat chu thur deuh bem bum an put bakah make-up an hmang nasa a, an thawmhnaw pawh mi mit la thei tur ber, leather, jeans tih vel an inbel nasa hle. Glam metal hi a style hrang hlak tihna a ni lo a, an music kalpui chu heavy metal niin, ‘glam’ tih hming a put tel chhan ber chu an pawnlam lan dan vang liau liau hi a ni.
Rock Music pianthar lehna (1990s) :
1991 khan Nirvana chuan ‘Nevermind’ album an tichhuak a, alternative rock chu a alh chho ta hluai mai a. Hemi rual hian grunge rock an tih mai, hard rock leh punk rock inpawlh chu a rawn lar chho a, hetiang lam auchhuahpuitu Soundgarden te chuan rimawi khawvel chu an al hneh hle mai a. Nirvana dintu Kurt Cobain chu a intihhlum tak avangin alternative rock pawh hian thawm a nei chau nghal vat a, rock music kalphung pangngai chuan rimawi khawvelah thawm a rawn neih len leh phah a. Limp Bizkit chuan hard rock leh rap inpawlh hmangin style thar danglam tak mai an rawn larpui a. Staind leh Puddle of Mudd te chuan Limp Bizkit kalphung an rawn zawm a; mahse, anni hi chuan melodic hard rock an hrut tel thung a. Band tam tak, grunge kalpui deuh si, alternative huanga tel thei chiah si lo - Red Hot Chili Peppers te chu an rawn lang ve tan a, anni bakah hian Foo Fighters te pawh an rawn lang ta bawk a. Kum zabi 21 na a rawn inher chhuah meuh chuan 60s vel bawra rock ang kha a rawn piang chhuak tha leh a, mahse an kalphung erawh tunlai rimawi nena kaihkawp a ni tawh thung a. Heng zingah hian Linkin Park chu a langsar pawl an ni a, anni hian hip-hop leh metal an kaikawp a. 3 Doors Down chuan hard rock lam kalpui chungin contemporary music chu an telh a, style danglam tak mai an rawn nei a ni. Rock music hi a tawp mai dawn lo a, kalphung pangngai rengin kal lo mahse style thar deuh hmangin nakin zelah pawh a la nung reng dawn tih a chiang a. Rock bulpui ban chuang si lovin, thil thar nen inkawp chungin a nung zel dawn a ni.

Mizo thalai zingah sex a hluar

Tunlaiin Mizo thalaite zingah mipat hmeichhiatna hmang dik lo an tam thu an sawi nasa hle a. Mi tawngka atanga hriat mai piahlamah a tak ram lamah Mizo thalaite hi sex ah chuan an lo sang hle mai a. Mizo sex video pawh hmuh tur tam tak a awm a, heng video te hi chu a ler chauh a ni zawk a. Sex video te hi chu a rawn parchhuahna ang chauh a ni a, hemi piahlama kan hmuh phak lohah a bupui tak tak chu a awm a, rin phak bakin a nasa a. Tunlaia ‘nula sawn pai ngam’ te hi chu an fakawm zawk tih hi fiamthua lak mai chi ni pawhin a lang ta lo.
Ka thianpa pakhat, helam kawnga rawngbawltu ka kawm chuan heti hian min hrilh a.
“Hmanni deuh khan gypsy in kan thianho chu Rangvamual lamah kan tlan thla a. Lei tlahniam kan pel deuh chiah tihah khuan hmeichhe tleirawl, hmeltha tak, pawnfen khup chen vela chhing feng hian min lo phar ding a. A awm lah chu a tawk chiahin a inhawng zau a.
“Motor seat hnungah chuan a rawn chuang ve a. A tirah chuan ka thiante chu an phurin han fiam vel pawh an chak hle tih an chezia leh hawiher atang chuan a lang thei a. Han fiam hmasatu nih kha an ngam lo tlang niin ka hria.
“Mahse, thui vak lo kan tlan hnu chuan chu tleirawl te chuan heti hian a rawn sawichhuak ta tlat a. ‘Rangvamualah zu in ila, min pawl rawn ula’
“A thusawi chuan ka thiante chu phurna a pe lo mai ni lovin, a ti ti zawk tih ka hre mai a. Tumah chechang ngam pawh an awm lo. Rangvamualah chuan kan chhuktir a, kan tlansan zui ta a,” tiin min hrilh a.
He thu min hrilhtu hi ka hriat chian mi tak, kohhrana rawngbawlna pawimawh tak nei a nih avangin dawt a sawi lo tawp ang tih a chiang hle.
Heti hian a sawi leh a.
“Hmannia tleiawl ka kawm (counselling) chu kum 19 chauh a ni a. A hmel a thain zirlai naupang a la ni a. Chu tleirawl te chuan sex ah harsatna a tawk mek a.
“Ka bula a sawi dan chuan mi pakhat (Pa nge tlangval ka hre lo) hian ka sikul kal hi min hmu thin a. Chupa chuan ‘Mami, ka mutpui che ang a, scooty ka lei ang che’ a ti thin a.
“A tir chuan ka duh bik lo a. Mahse, hun a lo kal zel a, scooty chu ka awt tual tual a. A tawpah chuan chupa chuan min mutpui ta a. Tichuan, a thian dangte hnenah min hlan chhawng zel a, scooty pawh chu min leisak chuang si lo a... tiin tap chungin min hrilh a.
“Top-up mana thlem theih hmeichhia an awm tih hi a lo nep hle zawk niin a lang.”
Ka thianpain hetiang thu min hrilh atanga ka rilrua awm ta chu, a hmeichhiate va demna lam ni lovin, tunlaia sex video-a hmeichhe hmel chauh a lang ta fo mai han ngaihtuah let hian hmeichhiate pawh hi an fin leh an harh chhuah chu a hun ve tawhin a lang.
Mipate hi hmeichhiate ai chuan sex lamah chuan kan sang zawkin, hmeichhe mal tlem a lan pawhin kan ngaihtuahna hi a nilo zawngin a hruai thei tlat zel a. Chuvangin, nu leh pate pawhin kan fate incheina te hi enpuiin, hriatpui zel pawh a pawimawh hle.
Thawmhnaw dawrawm leh thehlep lutuk an inbel tur te, pawnfen chhing lutuk leh lang tlang thei khawp inbelte pawh hian thil pawi a thlen theihzia hi hrilh fo a tha hle.
Hei mai ni lovin, concert leh puipun nikhua, picnic leh party naa hmeichhe tleirawl chhuak tam ta lutuk hi nu leh pa te zawk hian kan khap beh a ngai a. Kan fate kan control zo ta lo nge, kan control ngam lo zawk tih thlengin a ngaihtuah theih. Inngaihtuah a hun tawh khawp mai.
A thuhrimin, tunlaia thalaite inngaihzawn dante pawh hi ngaihtuah tham a tling ta a. Sex hman dun kher loh chuan kim lo riaua inhriatna hia awm ta em ni ? Tunhma te kha chuan vawikhat inmelh zeuh khan karkhat te a daih thin a nih kha maw!!!
Thalai zingah sex a hluar a, tunlai hian Setana biakna chungchangah thawm a awm ve reng bawk a. Kan ram hi sualin a luhchilh hneh tawh hle a, inven nasat a ngai ta hle mai.
Setana biakna chungchang kan sawikai leh a, ka thianpa chuan heti hian a sawi leh bawk a.
“Mizorama Setana biakna chungchang pawh hi dawt a ni lo. Tunhma deuh, kum 5 vel kaltaah khan hetiang lama harsatna tawkte hi kan buaipui chiam tawh a. Rin phak bakin kan thalaite hi an lo lut thuk a. Zirlai naupang pawh an awm ve zel a, hmeichhia pawh an bang bik lo.
“A rapthlakzia leh chhuah a harsatzia te mit ngeia hmutu ka nih avangin helam kawnga kal ve lo tur hian he thu chhiartu zawng zawngte hi ka ngen duh a ni.
“Ka thil chhui ruk ve mai mai sawilan ka duh chu - Setana biaknaa inhnamhnawih tawhte hi thatchhuahna kawng an zawh hnu pawh hian sualin a umzui nasa bik a. Mahni intihhlum pawh a awl tih hi hriat a tha. Tin, ruihhlo ti thin an nih phei chuan relapse hi a awl zual bik niin a lang,” a ti a.
A sawi zelnaah, “Hmanni deuh khan kan nau pakhat chu sualin a luhchilh a, nasa takin a tibuai a. A zan a zanin kan thawk chhuak a. Khatih laia a power neih lai kha chuan WWE wrestler Big Show pawh hmachhawn se, a hneh lohna tur a awm lo hrim hrim.
“Mahse, Setana hian kan Pathian hi a ngam lo em mai a, a hneh hlawl bawk si lo nen a, a tlawm zawk chu a ni leh zel zawng a nih hi.
“Chu kan nau chuan heti hian tawitein a sawi a. ‘Tunhmaa Setana biakna bawiha ka talchhuah hnu khan ka relapse leh a. Tichuan ka hnenah thusawitu hi a awm ta tlat a. Ka hnena thusawitu chuan midang tihlum tur leh biak in suasam turin min tir thin’ a ti.
“Mahse, chutiang em a thlen hmain Lalpa’n hna a thawk a, Setana kawng chu a titawp ta zawk a,” tiin a sawi a. “Mi tam tak chuan Setana biakna hi kan ramah awm tak tak lo angin an ngai a, mahse thil awm ngei chu a ni si,” a ti bawk.


Heti zawng hian :
‘Chhungkua hi sawrkar tobul’ an lo tih ang hian chhungkaw inkaihhruaina tha hi kan ram hian a mamawh a ni. Zep thu ni suh se, nu leh pate chhunah nilenga kan chhuah hnu hian zanah fate uap hman lovin kan chhuak zui leh a. Sual tan chuan kan fate beih chu a harsa lo viau in a hriat a. Zalen takin, venpuitu awm lo beih chu a harsa hauh lo ang.
Chumi a nih avang tak chuan nu leh pate hian kan fate theuh hi i vei teh ang u. Dik tak chuan kan inchhungkhura buaina chinfel hi pa berin a tum lo a, fa sual neite chuan khawi Centre/Home/Speaker te emaw chinfel tir kan tum mai zel a. Hetianga tih hi a fuh ber em tih ngaihtuah nawn leh a ngai hle.
Mahni inchhungkhur pawh rel fel thei lo khan ‘khawtlang, ram ka vei’ tiin thawk viauah kan inngai leh si a. Thildang vei hmain mahni chhungkaw fel leh fel loh hi vei hmasa ila, tun aiin kan ram hi a felfai ang a, kan buaina tam zawk hi chu a kiang thei ngei ang.
Nu leh pa tam zawkte chuan an fate chin an hre lo hle a, an ngaihven hek lo a. Ngaihtha taka an awm veng veng laiin an fate chuan sual kawng thuk tak an lo zawh hman thin. Mahni fate sualna hmu thei lo, midang fate aia dahsang em em, mi fate sualna hre thei riau an awm thin a, hetiang mite hian an fate an enkawl puitling lo tlangpui a tih theih.


Aizawl dinhmun :
Kan fate chin hriat a ngai tawh tih a lanna chu tunhnaia New Life Home Society (NLHS) in zirchianna an neih atang khan a tih theih a. Aizawl khawpui chhungah hian KS kan tih, hmeichhe inzuar hi mi 294 awmin an sawi a, an hriat bak pawh hi an awm ngei ang tih a rinawm.
Heng mi 294 zinga 156 te chu khawlaia inzuar thin an ni a, 110 te chu ualau takin an inzuar ve lem lo a, mobile phone hmangin emaw, midang kaltlangin emaw an dawr theih thung a. Mi 28 te chu mahni in lum atangin an inzuar a, dawr duh nazawng an kawm lem lo a, dawrtu deuh bik nei an ni tlangpui.
Mi 294 zingah hian tleirawl an tam hle mai a, kum pawh la tling lo, kum 10 leh 15 inkar pawh mi 3 chu an tel ve tlat mai a. Kum 16 leh 20 inkar hi mi 68 ngawt mai an awm bawk a, kum 21 leh 25 inkar hi a tam ber an ni a, mi 94 an awm.
Kum 26 leh 30 inkar hi 79 ah awm a, kum 31 leh 35 inkar hi mi 40 an awm bawk a. Kum 36 leh 40 inkar hi mi 6 awmin, kum 40 chin chunglam hi mi 4 chu an awm bawk a ni.
Zirna lamah chuan mi 43 te chu primary school thleng chauh kal an ni a, 89 te chu middle school rap pha an ni a. High school kal an tam ber a, mi 118 lai mai an ni a, higher secondary kal hi mi 42 an awm a, graduate 2 pawh an awm ve bawk.
An zinga 142 te hi pasal la nei lo hrim hrim an nih laiin, mi 25 te hi chu pasal nei lai an ni a. 127 te chu a hmaa pasal lo nei tawh, tunah chuan inthen leh tawh an ni.
Mi 248 te hi chu Aizawla cheng an ni a, a bak 46 te chu khaw dang atanga rawn lut an ni hlawm a. 221 te chu an chhungte hnena la awm an nih laiin 73 te chu an in atanga chhuak tawh an ni thung.
An inzawrh chhan an zawhkualnaah 56 te chu an chawrchhuahna chhungkuain a zir loh vang a ni a, 13 te chu an awm that duh loh vang a ni thung a. 31 te chuan an retheih em avangin inzawrh hi an tan a, 65 te chu mi neih ang neih ve duh vang te, incheina tha neih duh vang tein an inzuar a, mi 5 chuan pasal an then tak avanga inzuar an nih thu an sawi a. Ruihhlo duh vanga inzuar hi an sang fal hle a, 120 ngawt an awm a, mi 4 te chu kum an tlin hmaa miin an pawngsual avanga inzuar an ni.
NLHS in an kawm kualte hi an inzawrh hmaa mipat hmeichhiatna hmang tawh vek an ni a, biak in hawnga innei aiin hawng lo a innei an tam zawk a. Tuna an hriat theih mai pawh hetiang zat hi a nih laiin, an la hriat loh hi a tam zawk an nih an rin thu NLHS hian an sawi a. Heng an la hriat ve loh zingah hian tha leh fel nia kan hriat, kan fate ngei hi an tel ve mial lo maw tih hi ngaihtuah chian a ngai hle.
Anni ho dawr thintu zingah hian mipa, pawmlai nei an tam ber a, 80% zet mai niin, 60 te chu Mizo an ni a, a dang 20 te chu hnamdang an ni thung a. Tleirawl hi 5% niin, 4 chu Mizo an ni a. Pathlawi leh pa valai hi 15% an ni a, an zinga 10 chu Mizo an ni.