Mizo thalai zingah sex a hluar

Tunlaiin Mizo thalaite zingah mipat hmeichhiatna hmang dik lo an tam thu an sawi nasa hle a. Mi tawngka atanga hriat mai piahlamah a tak ram lamah Mizo thalaite hi sex ah chuan an lo sang hle mai a. Mizo sex video pawh hmuh tur tam tak a awm a, heng video te hi chu a ler chauh a ni zawk a. Sex video te hi chu a rawn parchhuahna ang chauh a ni a, hemi piahlama kan hmuh phak lohah a bupui tak tak chu a awm a, rin phak bakin a nasa a. Tunlaia ‘nula sawn pai ngam’ te hi chu an fakawm zawk tih hi fiamthua lak mai chi ni pawhin a lang ta lo.
Ka thianpa pakhat, helam kawnga rawngbawltu ka kawm chuan heti hian min hrilh a.
“Hmanni deuh khan gypsy in kan thianho chu Rangvamual lamah kan tlan thla a. Lei tlahniam kan pel deuh chiah tihah khuan hmeichhe tleirawl, hmeltha tak, pawnfen khup chen vela chhing feng hian min lo phar ding a. A awm lah chu a tawk chiahin a inhawng zau a.
“Motor seat hnungah chuan a rawn chuang ve a. A tirah chuan ka thiante chu an phurin han fiam vel pawh an chak hle tih an chezia leh hawiher atang chuan a lang thei a. Han fiam hmasatu nih kha an ngam lo tlang niin ka hria.
“Mahse, thui vak lo kan tlan hnu chuan chu tleirawl te chuan heti hian a rawn sawichhuak ta tlat a. ‘Rangvamualah zu in ila, min pawl rawn ula’
“A thusawi chuan ka thiante chu phurna a pe lo mai ni lovin, a ti ti zawk tih ka hre mai a. Tumah chechang ngam pawh an awm lo. Rangvamualah chuan kan chhuktir a, kan tlansan zui ta a,” tiin min hrilh a.
He thu min hrilhtu hi ka hriat chian mi tak, kohhrana rawngbawlna pawimawh tak nei a nih avangin dawt a sawi lo tawp ang tih a chiang hle.
Heti hian a sawi leh a.
“Hmannia tleiawl ka kawm (counselling) chu kum 19 chauh a ni a. A hmel a thain zirlai naupang a la ni a. Chu tleirawl te chuan sex ah harsatna a tawk mek a.
“Ka bula a sawi dan chuan mi pakhat (Pa nge tlangval ka hre lo) hian ka sikul kal hi min hmu thin a. Chupa chuan ‘Mami, ka mutpui che ang a, scooty ka lei ang che’ a ti thin a.
“A tir chuan ka duh bik lo a. Mahse, hun a lo kal zel a, scooty chu ka awt tual tual a. A tawpah chuan chupa chuan min mutpui ta a. Tichuan, a thian dangte hnenah min hlan chhawng zel a, scooty pawh chu min leisak chuang si lo a... tiin tap chungin min hrilh a.
“Top-up mana thlem theih hmeichhia an awm tih hi a lo nep hle zawk niin a lang.”
Ka thianpain hetiang thu min hrilh atanga ka rilrua awm ta chu, a hmeichhiate va demna lam ni lovin, tunlaia sex video-a hmeichhe hmel chauh a lang ta fo mai han ngaihtuah let hian hmeichhiate pawh hi an fin leh an harh chhuah chu a hun ve tawhin a lang.
Mipate hi hmeichhiate ai chuan sex lamah chuan kan sang zawkin, hmeichhe mal tlem a lan pawhin kan ngaihtuahna hi a nilo zawngin a hruai thei tlat zel a. Chuvangin, nu leh pate pawhin kan fate incheina te hi enpuiin, hriatpui zel pawh a pawimawh hle.
Thawmhnaw dawrawm leh thehlep lutuk an inbel tur te, pawnfen chhing lutuk leh lang tlang thei khawp inbelte pawh hian thil pawi a thlen theihzia hi hrilh fo a tha hle.
Hei mai ni lovin, concert leh puipun nikhua, picnic leh party naa hmeichhe tleirawl chhuak tam ta lutuk hi nu leh pa te zawk hian kan khap beh a ngai a. Kan fate kan control zo ta lo nge, kan control ngam lo zawk tih thlengin a ngaihtuah theih. Inngaihtuah a hun tawh khawp mai.
A thuhrimin, tunlaia thalaite inngaihzawn dante pawh hi ngaihtuah tham a tling ta a. Sex hman dun kher loh chuan kim lo riaua inhriatna hia awm ta em ni ? Tunhma te kha chuan vawikhat inmelh zeuh khan karkhat te a daih thin a nih kha maw!!!
Thalai zingah sex a hluar a, tunlai hian Setana biakna chungchangah thawm a awm ve reng bawk a. Kan ram hi sualin a luhchilh hneh tawh hle a, inven nasat a ngai ta hle mai.
Setana biakna chungchang kan sawikai leh a, ka thianpa chuan heti hian a sawi leh bawk a.
“Mizorama Setana biakna chungchang pawh hi dawt a ni lo. Tunhma deuh, kum 5 vel kaltaah khan hetiang lama harsatna tawkte hi kan buaipui chiam tawh a. Rin phak bakin kan thalaite hi an lo lut thuk a. Zirlai naupang pawh an awm ve zel a, hmeichhia pawh an bang bik lo.
“A rapthlakzia leh chhuah a harsatzia te mit ngeia hmutu ka nih avangin helam kawnga kal ve lo tur hian he thu chhiartu zawng zawngte hi ka ngen duh a ni.
“Ka thil chhui ruk ve mai mai sawilan ka duh chu - Setana biaknaa inhnamhnawih tawhte hi thatchhuahna kawng an zawh hnu pawh hian sualin a umzui nasa bik a. Mahni intihhlum pawh a awl tih hi hriat a tha. Tin, ruihhlo ti thin an nih phei chuan relapse hi a awl zual bik niin a lang,” a ti a.
A sawi zelnaah, “Hmanni deuh khan kan nau pakhat chu sualin a luhchilh a, nasa takin a tibuai a. A zan a zanin kan thawk chhuak a. Khatih laia a power neih lai kha chuan WWE wrestler Big Show pawh hmachhawn se, a hneh lohna tur a awm lo hrim hrim.
“Mahse, Setana hian kan Pathian hi a ngam lo em mai a, a hneh hlawl bawk si lo nen a, a tlawm zawk chu a ni leh zel zawng a nih hi.
“Chu kan nau chuan heti hian tawitein a sawi a. ‘Tunhmaa Setana biakna bawiha ka talchhuah hnu khan ka relapse leh a. Tichuan ka hnenah thusawitu hi a awm ta tlat a. Ka hnena thusawitu chuan midang tihlum tur leh biak in suasam turin min tir thin’ a ti.
“Mahse, chutiang em a thlen hmain Lalpa’n hna a thawk a, Setana kawng chu a titawp ta zawk a,” tiin a sawi a. “Mi tam tak chuan Setana biakna hi kan ramah awm tak tak lo angin an ngai a, mahse thil awm ngei chu a ni si,” a ti bawk.


Heti zawng hian :
‘Chhungkua hi sawrkar tobul’ an lo tih ang hian chhungkaw inkaihhruaina tha hi kan ram hian a mamawh a ni. Zep thu ni suh se, nu leh pate chhunah nilenga kan chhuah hnu hian zanah fate uap hman lovin kan chhuak zui leh a. Sual tan chuan kan fate beih chu a harsa lo viau in a hriat a. Zalen takin, venpuitu awm lo beih chu a harsa hauh lo ang.
Chumi a nih avang tak chuan nu leh pate hian kan fate theuh hi i vei teh ang u. Dik tak chuan kan inchhungkhura buaina chinfel hi pa berin a tum lo a, fa sual neite chuan khawi Centre/Home/Speaker te emaw chinfel tir kan tum mai zel a. Hetianga tih hi a fuh ber em tih ngaihtuah nawn leh a ngai hle.
Mahni inchhungkhur pawh rel fel thei lo khan ‘khawtlang, ram ka vei’ tiin thawk viauah kan inngai leh si a. Thildang vei hmain mahni chhungkaw fel leh fel loh hi vei hmasa ila, tun aiin kan ram hi a felfai ang a, kan buaina tam zawk hi chu a kiang thei ngei ang.
Nu leh pa tam zawkte chuan an fate chin an hre lo hle a, an ngaihven hek lo a. Ngaihtha taka an awm veng veng laiin an fate chuan sual kawng thuk tak an lo zawh hman thin. Mahni fate sualna hmu thei lo, midang fate aia dahsang em em, mi fate sualna hre thei riau an awm thin a, hetiang mite hian an fate an enkawl puitling lo tlangpui a tih theih.


Aizawl dinhmun :
Kan fate chin hriat a ngai tawh tih a lanna chu tunhnaia New Life Home Society (NLHS) in zirchianna an neih atang khan a tih theih a. Aizawl khawpui chhungah hian KS kan tih, hmeichhe inzuar hi mi 294 awmin an sawi a, an hriat bak pawh hi an awm ngei ang tih a rinawm.
Heng mi 294 zinga 156 te chu khawlaia inzuar thin an ni a, 110 te chu ualau takin an inzuar ve lem lo a, mobile phone hmangin emaw, midang kaltlangin emaw an dawr theih thung a. Mi 28 te chu mahni in lum atangin an inzuar a, dawr duh nazawng an kawm lem lo a, dawrtu deuh bik nei an ni tlangpui.
Mi 294 zingah hian tleirawl an tam hle mai a, kum pawh la tling lo, kum 10 leh 15 inkar pawh mi 3 chu an tel ve tlat mai a. Kum 16 leh 20 inkar hi mi 68 ngawt mai an awm bawk a, kum 21 leh 25 inkar hi a tam ber an ni a, mi 94 an awm.
Kum 26 leh 30 inkar hi 79 ah awm a, kum 31 leh 35 inkar hi mi 40 an awm bawk a. Kum 36 leh 40 inkar hi mi 6 awmin, kum 40 chin chunglam hi mi 4 chu an awm bawk a ni.
Zirna lamah chuan mi 43 te chu primary school thleng chauh kal an ni a, 89 te chu middle school rap pha an ni a. High school kal an tam ber a, mi 118 lai mai an ni a, higher secondary kal hi mi 42 an awm a, graduate 2 pawh an awm ve bawk.
An zinga 142 te hi pasal la nei lo hrim hrim an nih laiin, mi 25 te hi chu pasal nei lai an ni a. 127 te chu a hmaa pasal lo nei tawh, tunah chuan inthen leh tawh an ni.
Mi 248 te hi chu Aizawla cheng an ni a, a bak 46 te chu khaw dang atanga rawn lut an ni hlawm a. 221 te chu an chhungte hnena la awm an nih laiin 73 te chu an in atanga chhuak tawh an ni thung.
An inzawrh chhan an zawhkualnaah 56 te chu an chawrchhuahna chhungkuain a zir loh vang a ni a, 13 te chu an awm that duh loh vang a ni thung a. 31 te chuan an retheih em avangin inzawrh hi an tan a, 65 te chu mi neih ang neih ve duh vang te, incheina tha neih duh vang tein an inzuar a, mi 5 chuan pasal an then tak avanga inzuar an nih thu an sawi a. Ruihhlo duh vanga inzuar hi an sang fal hle a, 120 ngawt an awm a, mi 4 te chu kum an tlin hmaa miin an pawngsual avanga inzuar an ni.
NLHS in an kawm kualte hi an inzawrh hmaa mipat hmeichhiatna hmang tawh vek an ni a, biak in hawnga innei aiin hawng lo a innei an tam zawk a. Tuna an hriat theih mai pawh hetiang zat hi a nih laiin, an la hriat loh hi a tam zawk an nih an rin thu NLHS hian an sawi a. Heng an la hriat ve loh zingah hian tha leh fel nia kan hriat, kan fate ngei hi an tel ve mial lo maw tih hi ngaihtuah chian a ngai hle.
Anni ho dawr thintu zingah hian mipa, pawmlai nei an tam ber a, 80% zet mai niin, 60 te chu Mizo an ni a, a dang 20 te chu hnamdang an ni thung a. Tleirawl hi 5% niin, 4 chu Mizo an ni a. Pathlawi leh pa valai hi 15% an ni a, an zinga 10 chu Mizo an ni.

Thalaite'n hmalam hun an ngaihtuah lo

Zirmite chuan chik takin tunlai thalaite mizia an zir a, heta an hmuh dan chuan thalai tam zawkte chuan hmalam hun hi an thlir ngai lem lo niin an sawi.
Mithiamte’n an sawi dan chuan thalaite hi an hun hmanlaiah hian an lungawi tawk hle a, eng dang mah an ngai lo a, hetiang vang hian an hmalama an awm dan tur hi an ngaihtuah thlen loh phah thin a ni.
Hei hi kawng tam takah chuan a dik hmel viau reng a, thalaite zingah hmangaihna leh hmeichhiat mipat kawnga che fuh lo sawi tur pawh an tam reng a. Hetiang mite an chet fuh loh chhan berah hian an hmalam hun an thlir loh vang niin an sawi.
Thalaite’n thil an thlir thui loh hi thenkhat chuan tha an tih zawk a rinawm a, hetianga tha ti zawkte chu an nu leh pate hi an ni thei tlat mai a. Nu leh pa tam tak chuan an fate chu holam tak, thil ngaihtuah ril lem lo tak an nih hian enkawl nuam an ti zawk a ni.
Hun lo awm zel tura an awmdan tur an ngaihtuah lawk lem loh avang hian sum lamah pawh thalaite hi an rilru a fing lo tlangpui a. Hetiang mite hi chuan an sum hmuh leh an hman chhuahte hi an vei zui vak lo a, pawisa khawl pawh an tum em em chuang lo a. Tam tak chuan nakina sum tam tham deuh neih ai chuan tuna tlemte hmuh theih nghal an duh fo a, hei hian an ngaihtuah tlemzia a tilang chiang hle.
Heng thalai thlir thui lote tan chuan ruihtheih thil leh lirthei hi hnaih loh a tha ber a. Hetiang thil nen an inhnaih viau phei chuan a tawpah thil pawi lian tak a thleng duh khawp mai.
Ruihtheih thil leh lirthei bakah hian zirna chhunzawm loh mai mai hi an tan a pawi em em bawk a. Thalai ngaihsam vek vek chuan an zirna tihtawp mai pawh pawitihna an nei lo a, hei hi venpui an ngai hle a. An khawvel hman dan ber chu a tlachawpa nun a ni mai a. Sum hmankhawp, hmeichhia/mipa, lirthei tih vel an neih chuan an lung a awi em em mai a ni.

Mizoram XI in Nigerian XI an hneh

Ni 29.4.2009 khan Lammualah kangmei tuar tanpuina tur, Charity Match chu Nokia Nigerian XI leh Mizoram XI te chuan an khel a, an khelh hma atang tawhin an incho dun salh salh bawk a, beisei ang ngeiin an tan phat atangin a boruak a tha nghal.
Inkhel entu mipui an thahnem a, thawm lah a tha hluah hluah hle bawk a. Nigerian player te hi an lian tha theh thawh hle a, pianphungah chuan Mizo player te hian an pha lo hle a, heti chung hian Mizoram XI hi an zam bik chuang lo. Nigerian player te hi kawng engkimah an chungnung a tih theih a, ball khawih hrim hrimah te, fitness ah te, heading ah te Mizo hi an hnufual zawk vek a ni.
Inkhelh tan atanga rei vak lovah Mizoram XI striker Rinkhuma chu a intina hlauh mai a, a khelh chhunzawm thei lo a. An thiampuipa ber a chhuah tak daih avangin Mizoram XI hi an zam mai a rinawm laiin an khelh dan a danglam chuang miah lo.
An inkhel boruak hi a tang tha et awt hle a, team lehlam lehlam player te pawh an tang tak tak tih a lang thei a, han indinchilh deuh ran pawh hmuh tur a awm nual hman a, amaherawhchu, boruak duhawm lo erawh a awm ta lo.
Han innawr deuh ngar ngar mahse khawi lam mah hian goal an thun thei lo hle a, first half chhung zawng chuan goal lut a awm ta lo a.
Second half an khel chho leh a, Mizoram XI hian free-kick an hlawh a, hei hi inkhelh zana India U-19 camp pan nghal Malsawmfela chuan a pet a. Ball chuan Nigerian XI cross-bar a va per dawt a, heta ball let leh hi SSA striker Lalrochama, Kawlkulh chuan a lo tauhlut a, Mizoram XI chuan hma an hruai ta a, goal a lut chiah chu Lammuala mipui pungkhawmte thawm chu a ring tha hle.
Hemi hnu hian goal a luh belh tawh lo a, Mizoram XI chuan tl^wm tum lo Nokia Nigerian XI hi 1-0 in an hneh ta a ni.
Nokia Nigerian XI hian ram pawnlama khel, Mizo player tha thlankhawmte chu ni 1.5.2009 hian an hmachhawn leh dawn a, Lammual lama intawhkhawm leh ngei a fuh ang.

Mak Thei Ve!!!!

Milem hi en thuak chuan mihring taksa suasam hrep hnu a ang viau mai a. Heng lemte hi mihring tak tak ni lovin Thailand rama chhang an siam a ni. A tak a ang lutuk a, a eitu nih pawh a chakawm lo rum rum mai!!!!

Nau lian lutuk tan hnute cancer a hlauhawm bik!!

Naute pianghlim te hi an piantirha an len dan azirin hnute cancer vei hma tur an hriat theih niin tunhnai khan mithiamte chuan an zirchhuak a. Hmeichhiate hi an pian hlima an len viau chuan nau pian pangngai takte aiin an len hnuah cancer hi an vei awlsam bik an ti.
Zirmite chuan nau piang hlim 6,00,000 chuangte chu uluk takin an zir a, kawng chi hrang hrang 32 a an zir hnuah hei hi an zirchhuak ta a.
A zirchiangtu London School of Hygiene and Tropical Medicine te chuan naute pian tirha an len zawng chuan hnute cancer zinga 5% chu a tifiah thei an ti a ni.
Hetianga naute lian deuh te’n cancer an vei hma avang hian nau pai reng reng chu inuluk a ngai lehzual niin an sawi a.
Nau hrisel tha tak nei thei tur chuan nau pai nu chuan a taksa a enkawl tha tur a ni a, a rihna pung tur pawh theihtawpin a veng tur a ni an ti a. Hei bakah hian zu lampang in loh tur a ni a, ei leh in lamah pawh a insum viau tur a ni bawk.
Professor Isabel dos Santos Silva chuan nau pian hlima an rihna, an sei zawng leh an lu awmdan te chu cancer nen hian inkaihhnawih theih dan a awm vek niin a sawi a. Nau piang hlim, kg chanvea rit chin tan hnute cancer vei theihna hi 7% vel a nih thu a sawi.
Nau piang hlim, 51 cm (20 inches) a sei te chu kum 80 an nihin hnute cancer vei theihna hi 11.5% a nih thu a sawi a. Naute 49 cm (19.3 inches) a seite tan chuan 10% vel a ni thung.
Naute len lam, a rih zawng leh a sei zawng bakah hian tarlan tawh angin nau pai laia alcohol lampang in hi a pawi em em mai a. Nau pai laia zu lampang in thin fa te chuan cancer hi an vei awlsam hle a. Hetiang a nih avang hian nau pai lai chuan hetiang lam hi lem loh a him ber a ni.
Professor Isabel dos Santos Silva chuan heng thilte leh hnute cancer a inkaihhnawih daih dan hi a chhan an la hriat mai bik loh thu a sawi a. Chiang taka a inkungkaihna hre turin nasa lehzuala zir an tum thu a sawi tel bawk a ni.
Dr. Sarah Cant, Breakthrough Breast Cancer chuan, “Hnute cancer hi natna buaithlak tak mai a ni a, hmeichhe tan chuan chhan hrang hrang vangin a vei theih vek a. Enge a chhan bulpui ber chu kan la hre bik lo a, an pian tirha an len dan hian a hril tel ngei tih chu kan chiang,” a ti.
Dr. Sarah Cant chuan nau piang hlim len zawng chu engtinmah an tihdanglam theih loh thu a sawi a. A tihdan tha ber chu an kum a tam chhoh zel hnuah an rihna tihhniam dan ngaihtuah a ni a. Hemi tur hian an ei leh in lama fimkhur viau a pawimawh bakah alcohol lam reng reng tih loh a tha ber niin a sawi bawk.
Breast Cancer Care thupuangtu chuan, “Hmeichhia zawng zawng, a bikin pasal nei tharte chuan he zirchianna hi an hlau viau maithei a. Hnute cancer hi hmeichhe kum 50 tling tawh zingah hian a tam hrim hrim a, hei vang hian inenkawl uluk hi a tha ber a ni,” a ti.
UK ah khuan hnute cancer hi kumtin hmeichhe 46,000 vel an enkawl ziah a. Kumtin hian hnute cancer vanga thi hi mi 12,400 vel an awm ziah bawk.

Khawvel a tawp dawn em ni ?

Tunlai hian khawvel tawp chungchang chu mi tam takin an buaipui nasa hle a. Hetianga sawi a tam tak viau chhan hi chu Mayan Calendar ah December ni 21, 2012 hi khawvel tawp hun tur angin a lang a ni.Mayan ho, Nostradamus, Thuthlung Hlui hunlaia zawlneite, Isua zirtirte bakah tunlai scientist te chuan kan solar system ah planet thar ‘Nibiru’ a pian tur thu an sawi lawk a, he planet thar hi ‘12th Planet’ emaw ‘Red Planet’ emaw ‘Planet X’ tiin emaw an ko a. He planet thar hian kan chenna khawvel hi a rawn su chhe dawn niin Mayan ho chuan an ngai a ni.

Buaipui tanna : December ni 8, 2006 a Mel Gibson-a film siam ‘Apocalypto’ an tihchhuah atang khan Mayan Calendar hian ngaihven a hlawh thar leh viau mai a. Heng mite hian khawvel tawp hun chu an buaipui ber a ni.‘Apocalypto’ tih hi Greek tawng a ni a, a awmzia chu ‘Thil inthup khuh hawnna leh bul tan tharna’ tihna ang a ni a. Hei hi Mayan hovin ‘Fin de los Tiempos’ an tih, khawvel tawp hun tur an sawi nen a inrem hle a, hei vang hian an ngaihven phah lehzual a ni.

Mayan Calendar : Mayan Long Count Calendar ah chuan ‘End Date’ hi 13.0.0.0.0. ah tihlan a ni a. Hetah hian an Calendar pawh a tawp chiah a, hemi ni hi ‘Winter Solstice’ chiah a nih bakah December ni 21, 2012 chiah a ni bawk a. Hei vang hian he ni ngei hi khawvel tawp ni a nih ngei an ring tlat hlawm a ni.Mayan ho hian 3113 BC khan Calendar hi an siam tan a. Calendar chithum an nei a, pakhat chu ‘Tzolkin’ an ti a, hei hi an Calendar serh ber a ni a. Hei lo hi agricultural calendar an tih mai ‘Haab’ a awm leh a. A pathumna leh khawvel tawp chungchang tarlangtu bera an sawi ‘The Long Count’ a awm leh a ni.A hnuhnung ber ‘The Long Count’ bik hian khawvel tawp hun tur chu a tarlang a. He calendar hi kum 5000 apiangin a intan thar leh ziah a, tuna a hun kalpui mek hi BC 3114 vel atanga intan kha a ni a. Mayan ho rin dan chuan hun hmasa ber chu Pathianin kan chenna khawvel leh a chhunga chengte a siam lai kha a ni a. Hun hnihna leh hun thumna ah chuan Pathianin hlum hmangin mihring a siam bakah thing leh hnim te a siam a. Tuna kan hun hman mek hi hun lina a ni a, hun tawpna niin an ngai bawk a ni.

Ngaihdan hrang : Mayan ho rin dan hi mi tam tak chuan an ring tawh viau mai a, anni ho lah hi hnam fing tak, mathematics, engineering leh astronomy lama thiamna nei sang tak an ni a. Hei mai bakah hian van boruak chanchin vel pawh an hre hneh hle bawk a ni.‘The Long Count’ in a tarlan dan chuan he calender hun hi kum 5,125.36 thleng daih tur a ni a, he hun hi December ni 21, 2012 ah a tawp chiah dawn a. He hun kal lai mek ‘The Great Cycle’ an tih mai hi a tawp a nih chuan khawvel pawh a tawp nghal turah an ngai nghet tlat a ni.Mi thenkhat chuan Mayan ho rin dan hi an tawmpui viau laiin thenkhat erawh chuan khawvel hi a tawp mai an ring lo hle thung a. Heng mi ho ngaihdan chuan khawvel hi tawp lovin hun thar danglam tak, mihring thiamna leh finna mai bakah kan taksa lan dan thlenga danglam hun kan thlen an ring ve thung a ni.

Calendar dang : Mayan calendar ah chuan khawvel tawp hun tur hi tarlan tawh angin December ni 21, 2012 a ni a, hetiang deuh hian calendar hrang hrang pawhin tawp hun tur an nei ve nual bawk a. Khawi ber hi nge rin ber tur hriat thiam a ni chiah lo a, Mayan ho calendar hi a dik ber tih theih a ni tlat lo.Hindu ho chuan 2003 khan an pathian Krishna chu khawvela lo kal turin an ring daih tawh a, tun thlengin an la beisei chhuak lo a. Muslim calendar chu 2076 a tawp tur a nih laiin Jewish calendar chu 2240 ah daih a tawp dawn bawk a ni. Carl Johan Calleman chuan Mayan calendar hi uluk takin a zir a, ani chuan ‘The Great Cycle’ hi October ni 28, 2011 a tawp tur angin a zirchhuak thung a. A zir dan chuan September ni 8, 2040 ah planet te chu an insiamtha leh dawn chauh a ni.

A tlipna : Khawvel tawp hun tur hi tunhma deuh atang tawhin mi tam tak chuan an buaipui nasa hle a, mahse tun thleng chuan a la tawp lo zel chu a ni a. Hetiang sawi sep hi awlsam taka lo ring ve zung zung chi hi khawvel hmun hrang hrangah an awm zel lehnghal a. A chunga ka’n tarlan takte pawh khi miin lo ring se tih vanga ziah a ni lo a, kan rilru sen zau zawkna atan leh hetianga sawi hluai hi a dik kher lo tih lantirna atan a ni zawk a. Miin an sawi nasat deuh avanga ni ngei tura lo ngaih ve ngawt chu a fel lo thei viau a, keimahni leh Pathian inkar hi tifel hmasa phawt zawk ila, heng thuthang mai mai hi chu kan buaipui hauh lo ang a. Eng hunah pawh khawvel tawp dawn se ringtu tak tak tan chuan engmah buaina tur a awm lo a ni.