Buaipui tham ‘Sexting’

Kum 10 pawh a la liam hman lo, khatih hunlai khan nupa emaw, inngaizawng karah emaw rinawmlo deuhte manchhuahna tha tak chu kawr nghawnga hmui hnawihsen kai te, hotel bill sang lutuk te emaw a ni thin a. Tunlai khawvelah chuan engkim a danglam zo ta.
Khawvel hmun hrang hrangah mobile phone in mihring nunah hmun a luah nghet tawh hle a. Kan ram ngeiah pawh mitin maiin neih an tum tawh a tih theih bawk a. Mobile phone hi a tangkai viau laiin kawppuite laka rinawmlohna lanchhuahtirtu a ni tan tlat. Ram changkangte ang bawkin hmundanga kal chhuak lem lo pawhin, mahni inchhung lum atangin kawppuite lakah a rinawm loh theih ta a. Kutzungpui chauh tiche chungin midang nen thinlung inpawh takin a awm theih der tawh a ni.
Khawvel hmun hrang hrangah hetianga SMS hmanga thu thianghlim lo tak tak inthawn hi an uar hle a, a sawi awlsam nan ‘sexting’ an ti mai a. A tir takah chuan thalai zawkte zingah a tam hle a, tunah chuan tlema phanchang zualte zingah pawh thil thar a ni tawh tlat lo. Ngaihzawng nei lai emaw, nupui pasal nei tawh emaw zingah pawh ‘sexting’ hian bu a khuar hneh tawh hle a. Tunhmaa uirena kan tih ang tak kha ni tawh lo mahse hei hi ‘uirena chhuak thar’ a tih theih hial tawh awm e. Thenkhat chuan uirena ang ema ngaih chu dik an ti lo maithei a, mahse psychotherapist Paula Hall chuan ‘tisa uirena’ em thleng lo mahse ‘rilru uirena’ a thlen hrim hrim avangin sawi hran theih a nih loh thu a sawi ve mauh mai.
Paula chuan, “Sexting ti thinte zingah thudik puanchhuah duh lohna thinlung a awm a, kawppuite laka thil zepruk ngai a awm avang hian a thianghlim tawh lo a. Kawppuite laka rinawmlohna lian tak chu a ni tawh hrim hrim,” a ti a.
“Hetianga kawppuite laka thuruk neih tlat hi a pawi a, inkawp zelna kawngah thil pawi tak a thlen thei a ni,” a ti bawk.
Ram changkang zawkah te chuan SMS mai ni lovin, an phone changkang tak tak hmangin an thlalak saruak deuh deuhte MMS hmangin an inthawn thin a. Hetianga an inthawn chhoh zel hnu chuan a taka intawn duhna thinlung a siam ta thin a ni.
Sexting hi a bik takin thalai zingah hian a hluar hle a, kan ramah chuan MMS te a la tih theih ve lem loh a, heti chung hian SMS hmang chungin sexting hi an kalpui nasa hle a. MMS leh SMS te hi inang lo viau mahse an tum chu a inang reng tho a, sawi hran theih chu a ni lo. Mithiamte sawi dan chuan sexting hian mipat hmeichhiatna ang bawkin mi pahnih inkarah boruak thianghlim lo tak a siam thin a. Hetiang thil hi chin laklawh tawh chuan atchilh theih em em a ni a, hei vang hian thil hlauhawm tak a ni.
Tam takah chuan taksa intawng kher lo pawhin an kalpui a, hmai chhana inhmu kher lo pawhin thu zahmawh tak takte an inthawn tawn thin a. Hetiang thil hian kawppuite nena inthenna a thlen nasa hle a. Mi tam tak chu an kawppuite nen an hlim loh em avangin sexting lamah hian an inhmang nasa a. An rilru hah tihdamna atana hmang niin chhuanlam an siam a. A dikna chen a awm laiin, a rei deuh hnu chuan an atchilh chho a, a bawihah an lut ta thin a. An duh hunah an talchhuak leh thei thin lo a ni.
Tunhnai lawkah milar zinga hetiang thil vanga inthen phah hi sawi tur an awm nual a. Chelsea left-back Ashley Cole pawh a nupui Cheryl Cole chuan a manchhuah phah a, tunah hian an inthen mek a. A hma deuhin golf lalpa tih hial Tiger Woods pawh a lo hmingchhe hluai tawh bawk a. TV presenter lar tak Vernon Kay pawh a nupuiin sexting vang hian a manchhuak a, an inthen phah tawh bawk. Ashley Cole, Tiger Woods leh Vernon Kay te hian an hmeichhe thil thawn thinte hi an mutpui theuh a. Tiger Woods phei chuan pakhat aia tam daih a mutpui lehnghal. A tir takah chuan an tum bik kher lo ang, mahse a rei deuh hnu chuan an thiltih chu nuam tihna an nei a, tih zel chakna an nei chho a. A tawpah chuan an nupuite tana an rinawmna kha an theihnghilh phah ta a ni.
2005 vel atang khan sexting hi sawi tur a awm tan a, US, UK, Australia, New Zealand leh Canada ah te hetiang hunlai atang hian an ching tan a.
2008 a tleirawl 1,280 vel an zawhnaah chuan kum 13-19 inkar (Group A) zinga 20% leh kum 20-26 inkar (Group B) zinga 33% te chuan anmahni thlalak, saruak deuhte ch midang an thawn tih an sawi a. Group A zinga 39% te leh Group B zinga 59% te chuan midang hnenah zahmawh rawngkai thu an thawn thin thu an sawi a.
UK bikah kum 11 leh kum 18 inkar zinga 38% te chuan hetiang zahmawh rawngkai milem leh thu hi an thawn nasa tih an sawi. Ram dangah chuan tleirawl te te, zahmawh rawngkai inthawn thinte hi an manchhuak nasa tawh a, dan hmangin an hrem zel a ni. American tleirawl zinga 15% te chuan an cell phone ah milem leh thu zahmawh tak tak an dawng thin a.
12 leh kum 17 inkarah 4% te chuan anmahni saruak thlalak emaw, an video emaw chu midang hnenah an thawn tawh bawk a. Kum 17 bawr vel zinga 8% te chuan hetiang thil hi an thawnchhuak a, 30% te chuan an dawng bawk.
Hmun thenkhatah chuan sexting vanga mahni intihlum an awm nual tawh a. Kum 18 a upa Jessica Logan chuan an sikulah bilapa a nei a, a bialpa hnenah hian a saruak thlalak a thawn a. A hnuah a bialpa nen hian an inban leh ta si a, a mipa chuan thlalak hi hmeichhe dang hnenah a thawn darh ta a. Heng hmeichhiate hian Jessica chu mihur chhuahin an chhuah phah a. Jessica chuan hrehawm a ti leh ta hle a, sikul pawh a kal ngam tawh lo a. Thla hnih hnuah chuan a bedroom ah a inawhhlum phah a ni.
Thil atthlak a ni :
Sexting hi thil atthlak tak mai a ni a, milem emaw, thu emaw pawh ni se, thawn tawh chu lak let leh theih a ni tawh lo a. Mi kuta a awm tawh chuan an duh duhin an tikual thei tawh a, pawi thui tak a thlen thei tlat a ni.
Thlalak emaw, video emaw te chu midangin an neih tawh chuan cell phone mai bakah internet thlengin an thehdarh tawh thin a. Heti a nih chuan kumkhuain tihbo theih tawh lohin a awm thei a, mi nunkawng a tichhe vek thei tihna a ni a.
La naupang tak tak thlalak emaw, video emaw a nih phei chuan an khawsak zelna turah harsatna tam tak a thlen thei a. Kawppui zawn kawngah phei chuan buaina lian tak an tawk ngei ang a, kawppui tur hmuh zawh loh pawh awl tak a ni ang.
Tunlai khawvel changkang tawhah chuan mitinin privacy vawn thiam hi a pawimawh tawh lehzual a. Sexting lama inhnamhnawih loh hi a him ber a, luhchilh laklawh chuan chhuah a harsa a, a atthlak mai bakah hian thihna hial a thlen thei tih hriat a tha hle.

Sexting chu eng tihna nge?

Sexting tih chu mobile phone hmanga zahmawh rawngkai message emaw, milem zahmawh deuh deuh emaw inthawn tihna a ni.