Tlawhtu

Wednesday, August 10, 2011

Damdawi tel loa depression enkawl dan

Depression hi rilru lam natna chikhat a ni a.
Depression neite chu lungchhia, hnual, thinrim, hrehawm ti tak leh ngui takin an awm thin.

Mizo zingah depression nei hi an tam tawh a, a tam zawk chuan an nei tih an inhre lo a, inenkawl nachang pawh an hre lo a. Depression nei tih inhria, inenkawl lem lo pawh thahnem tak an awm bawk.
Depression nei hi thalai zingah an tam bik emaw tih theih a ni a, hetih rual hian kum upa lamah pawh an thahnem viau bawk a. Inenkawl loh avanga nunna chan an tam tawh hle a. Hei hi pumpelh tur chuan inzirtirna tha tak leh tam tawk tak kan dawn a ngai a ni.
Depression neih hi taksa natna ai hian a hrehawm daih zawk a. Hetiang neite hi chuan mahni chauha awm hran daih te an ching a, an thin a chhe thut thut thin a, an rilru te a na hma em em bawk a. An chaw ei a tui lovin, an mu thei lo thin a. Awmna ngaiah an awm reng thei lo a, thawpik up up ang tein an awm thin. Thil eng pawh ti dawn se an peih lo viau thin a, an thil tihna reng rengah an rilru an pe tha thei lo thin a. Hlutna nei reng reng lo nia inngaihna te pawh an nei thin.
Eng vanga depression hi awm nge tih hi mithiamte pawhin chiang takin an la sawi hleithei lo a. Thenkhat chuan thluaka chemical thenkhat inthlak danglam vang niin an ngai.
Mihring 10 zela 1 hi chuan kan damchhungin vawikhat tal chu depression hi kan nei niin mithiamte chuan an sawi a. Damdawi hmangin an enkawl tlangpui a, mahse depression damdawi thenkhat hi chak tak tak a awm avangin taksa tan a tha ber lo niin thenkhat chuan an sawi a. Hei vang hian damdawi tel loa enkawl theih tluka tha a awm lo.
Damdawi tel loa depression enkawl dan hi kawng hrang hrang a awm a, chu’ngte chu:
Insawizawi:
Mihring kan insawizawi hian kan harhvang a, kan rilru a tithawl thin a. Thil engemaw kan tihhlawhtlin hian keimahniah phurna te, mahni inrintawkna te min pe thin. Zing tlan emaw, infiamna chi hrang hrang ngaina lo tan pawh lam (dance) hi insawizawina tha tak a ni.
Tawm reng loh tur:
Inchhungah tawm reng loin chhuahvah zeuh zeuh a tha a, chuti a nih loh chuan mahnia awm reng hian a tul lo thleng thlenga inngaihtuah a awl a. Pawnah chhuakin thenrual te kawm tam ila, rilru hnual leh beidawng lutuk tur hi kawng tam takin a veng thei a ni.
Inkhel en thin rawh:
Hmeichhiate hian inkhel en hi an peih lo duh viau a, mahse hetianga inkhel en hian rilru a la peng a, depression nei tan chuan a tha em em a ni.
Ei leh in:
Depression neite chuan ei leh in uluk a ngai hle a, a theih hram chuan thlai leh thei lampang ei hnem a tha a. Thil mawm lampang ei nasat hian rilru a tihnual duh hle niin mithiamte chuan an sawi. Sa ngaina deuh tan chuan sangha ei a pawi lo a ni.
Zai nasat tur:
Zai vak vak hian rilru a tithawl a, depression nei thenkhat chuan damdawi leh thildang zawng aiin zai hian a pui tha ber niin an sawi.
Lehkhabu tha chhiar:
Lehkhabu chhiar tam a tha hle a, engemaw mai mai ni lo, lehkhabu pangngai chhiar tam a pawimawh hle niin mithiamte chuan an sawi a ni.

6 comments:

  1. post tha hle mai.

    ReplyDelete
  2. I post tha lutuk. Anxiety disorder lam te pawh hi mizoram ah pawh a mikhual tawhlo nia. Khawngaihin Generalized Anxiety Disorder leh a kaihnawih lam te han hrut tel teh. Kan mamawh ania. Mahni inhrethiam pawh chhungte, thiante, thawhpui te leh thenawmte pawn an hrethiamlo fo. Awareness a tul.

    ReplyDelete
  3. I post tha thin hle mai. Ka'n save keuh ang e. Ka mamawh tak a niin ka hria.

    ReplyDelete
  4. In tilawmawm hlawm hle mai... @Anonymous, a zira zir ka ni bik lo a, Anxiety Disorder lampang chu a va huphurhawm awm ve.. :-)
    @TS Khupchong, i lo hmang tangkai hlauh a nih chuan a lawmawm lampangah ngai hmiah mai ang aw.. :-)

    ReplyDelete
  5. Ih maw, zir ho hian an ziah duhloh hi. General awareness ania ka sawi chu. Internet ah te kan en a, chhiar tur a tam. Han ziah ve hi ka chak thin. Mahse tawngkam thiamloh chuan a huphurhawm ve a.GAD ka nei a, ka experience atang pawn ziah tur chu ka hre teuh mai a, mahse ka ziak huphurh deuh a. Tin, mizo te hi mental problem lamah kan la zim lutuk a, psychiatrist pantu nih te hi a la zahthlak a. Engpawhnise, hma han la teh, GAD lam chu.

    ReplyDelete
  6. I ziak tha hle mai.. Chanchinbu velah publish thei la ka va ti.. Ka chhung hnai tak hi depression ang hian a awm leh thin a.. heng lampang hi ka chhiar hnem hle.. Mizo tawng ngei hian circulate zau theih nise hi ka va ti tak em..

    ReplyDelete