RINTLAK PATHIAN

Mihring chuan khawvela kan chen chhungin duh dan te kan nei a, kan awm dan turah ruahmanna chi hrang hrang kan nei nasa viau thin. Amaherawhchu, hetianga mihring remruatna te leh ruahmanna te hian awmzia a lo nei lo khawp mai a ni tih a takin ka hmu chho a. Pathianin a thikthu chhiatzia a rawn lantir meuh chuan hai der theih rual a ni lo.

Tunhmain Kohhranah rawngbawltu te ka lo ni ve thin a, hun engemaw atangin rawngbawlna te chawlhsan a ngai a, mawhphurhnain min delh loh na na na chuan inthlahdah a lo awl khawp mai a. Kum tam fe chu Pathian lam hawi tha duh loin, Pathian ngaihsak mang loin hun ka hmang chho a.

Ka buai tan:
2016 kan hmang chho tan chauh a, kan innghahna ber mai, ka pa chu a vawihnihna atan cancer vanga enkawl a ngaih thu kan hria a. Hemi karah hian kei pawh ka inringhlel tan ve bawk a, mahse ka pa ber enkawl chhoh laia lo buai ve chu chhungte an khawngaihthlak tiin ka zep ta rih a.

Tu hriatpui lem lohin a rukin ka buai ve zak zak a, chaw ka hak nasa tial tial a, ka awm zawn velah hian a na veng veng reng a, a reh duh hauh lo lehnghal a, na chhawkna ka ei leh mai thin a. Tun hma atang tawhin ulcer nei thin ka ni a, ka awm dan pawh a hma ang deuh bawk a nih avangin ulcer ni turah ka ngai phawt a. Nidangah chuan ulcer damdawi strip khat ka ei zawh chuan a dam mai zel a, mahse inzawm veka strip li ka ei zawh hnuah pawh hma a sawn ta si lo a, ulcer ni loin cancer ngei a nih ka ring nghet nghal a.

Thil lem a harsa tial tial a, na chhawkna mum khat pawh thial sawm phawt loh chuan ka dawlh thei ta lo a. Thil ka ei that theih tak mang loh avangin ka rihna pawh a tlahniam chak khawp mai a, thla 4 chhungin kg 10 velin ka rihna chu a tlahniam hman a. Ka pa chemo khai vel nen ka la zep ta zel a, ka awm erawh a nuam tawh lo hle a.

August thla a rawn inher chhuak a, Mizoram Journalists’ Association (MJA) free medical check-up neih tur a ni a. Hun remchang a rawn inher chhuak si a, August ni 26, 2016 chu ka inentir hun tura kan hruaitute’n an lo ruat a ni a, ka nih tur ang ang nih tawh mai a tha tih rilru pu chungin Aizawl Civil Hospital ka pan ve ta a.

Tum dangah chuan a thlawn veka inentir kan nih avangin a theih ang ang chu kan ti kim viau thin a, mahse ka inrinhlelhna chu a dik ngeia ka hriat avangin endoscopy bak a ngaih loh thu ka sawi a. A tihna hmun tur ka pan a, kan thiante pahnih dang nen kan awm ran mai a, kei chu a hmasa berah min rawn ko a. An han en a, ka chaw kawng a cancer a ni tih chu a chiang khawp mai. Biopsy an la a, kar khat hnuah a result a hriat theih tur thu min hrilh a.

Pathian hnathawh a lang:
Civil Hospital atanga Dawrpui Vengthar pana ka haw chu ka rilruin ka vui nasa khawp mai a. “Ka pa a cancer nawn leh a, kei ka lo ni ve leh zel a, engati bik em em nge? Eng thil sual nge kan tih bik?” tih te, “Ka nupui fanaute hi heti mai hi an la ni ve si a, kalsan thei pawh ka la ni lo asin. Lo thihsan ta ila, engtin nge an awm ang?” tih te ka ngaihtuah a, hmalam hun chu a thim mup a ni ringawt. Pathian pawh ka dem titih deuh nghe nghe a, midang bulah engmah ka la sawi chhuak ngam der si lo.

In ka thlen hnu chuan mut pindanah ka lut a, Pathian hnenah ka tawngtai ta ngawt mai a. Chutah chuan  a vawikhatna atan Pathian hnathawh a rawn lang nghal a, ka tawngtai zawh hnu chuan chawp leh chilhin ka ngaihtuahna fel lo zawng zawng - a thim zawnga ka thlirna te, a vuivai zawnga ka thlirna te chu Pathianin min rawn paihbosak daih mai a. Hemi atang hian tun thlengin rilru hahdam deuhin ka awm phah ta reng mai a ni.

Chemo leh inzai:
Mizoram State Cancer Institute, Zemabawk-ah September, 2016 atangin chemo ka khai tan a, cycle 3 ka khai zawh hunah zai tura tih ka ni a. Ka inzai hun atan November ni 22, 2016 ni se tiin doctor te chuan thu an titlu a.

Mihring remruatna leh ruahmannain awmzia a neih lohzia a rawn lang tan a. October ni 30, 2016 ah ka pa chu a chauh sawt em avangin damdawi inah kan dahlut a. Ziaawm lam a pan thei meuh lo a, inzai tura damdawi ina ka luh ni tur, November ni 21, 2016 chuan kan chhungkaw innghahna ber, ka pa chuan Pathian dinglama thu turin min kalsan ta mai a. Ka inzai hun tur pawh chu sawn a ngai ta a, chemo in ka taksaa hna a thawh that lai taka min zai an duh si avangin kar khatin an sawn hla ta hram a.

Ka pa thih cham, kar khatnaah inzai turin damdawi inah ka lut a, ka pa vui atanga kar khatnaah tak min zai a. Darkar 5 zet min zai a, min zaitute - Dr. Saia leh Dr. Zothansanga Ralte te chuan hlawhtling an inti hle a, min zai tha viau mai a. Aizawl Hospital ICU ah ni 5 leh zan 5 ka awm a, hemi hnu hian cabin lamah ka insawn chhuak a. Kar 3 chuang zet damdawi ina ka awm hnuah ka chhuak ve thei hram a, in lamah Krismas kan hmang hman vel chiah a ni.

January, 2017 atangin chemo ka khai leh tan a, hemi thla hian cycle khat (cycle khatah ni hnih zel ka khai) ka khai a, February thlaah cycle 2 ka khai a, February ni 27 leh ni 28 ah a hnuhnung ber ka khai a. Min enkawltu Dr. Jerry chuan thla 3 hnua in report turin min ti a, hetah hian chemo hnathawh te an en leh dawn a ni tih te a sawi a.

Result duhawm:
June ni 19, 2017 khan Mizoram State Cancer Institute ka va pan leh a, CT scan te tiin thisen kan test bawk a. Hengte nen Dr. Jerry ka hmu leh a, ka taksaah cancer hnuhma hmuh tur a awm tawh rih loh thu leh thla 6 hnuah chauh in report tawh turin min lo ti a, Pathianin min awmpui nasatzia a lang chhuak!

Pathian thatzia:
December ni 1, 2015 khan ka pa tonsil dinglam a cancer a ni tih kan hre tan a, khami atanga a inenkawlna zawng zawng te, 2016-a a chuap cancer hmuh a nih leh hnua a inenkawlna zawng zawng mai bakah ka chaw kawng cancer a ni tih kan hriat atanga ka inenkawlna senso zawng zawng kha chhutin kan chhungkaw neih atang chuan tih ngaihna reng reng a awm lo. Mahse, mualpho leh bahlah miah loin engkim kan ti ve zel mai a, Pathian vang liau liau hi a ni chiang khawp a.

A hring a hranin Pathian chu kan hmu hauh lo a, mahse mi leh sa, vantirhkoh a lo ngah khawp a, a tul leh nachang kan hriat loh zawng zawng chu mi hian an rawn ti chat chat zel mai a. Chumi piahlamah kan pawisa mamawh tur ang chu a tlachawpin a rawn awm zel mai a. Keiniin kan tih theih awm chhun chu Pathian hnena dil a ni mai a, tih tak zeta kan dil chuan Pathianin kan dilna a lo ngaithla chiang khawp mai a, kan rin ngam chuan a lo rintlak chiang khawp mai.

Pathian inpuanna:
Cancer chu natnaah chuan tihbaiawm berte zinga mi a ni a, a hming ringawt pawh hian min khawih na viau hlawm thin a. Cancer vei chu thil lawmawm lo berte zinga mi a tih theih hial ang. Mahse, cancer hmanga Pathian inpuanna nasa tak mai avang hian ka chunga thil thlengah hian vuina tur reng reng ka hre lo a. Malsawmna chhiar sen loha min vur reng avang leh min awmpui reng avangin lawmthu ka sawi seng lo zawk a ni.

Christmas Everyday

A chanchin kan hriat dan chuan hmun hla takah a piang niin an sawi thin a. Thlasik a rawn thleng a, khua a rawn vawh tan hian Krismas lampangin kan rilru a rawn luah thar thin.

Nakin lawka Krismas Ni rawn thleng tur chu nghakhlel takin kan thlir zui a, kan theih ang tawk tawkin mi tin kan inpuahchah thin a. Kan thinlungah pawh midangte tana thil tha tih duhna a rawn piang a, mite tan thil tha tih dan turte kan ngaihtuah chho fo thin.

A bikin December thla chhung na na na chuan kan thinlungah thil dang a leng meuh tawh thin lo a, Krismas Ni hmuk thleng turin kan phak ang tawk tawkin kan inbuatsaih a, kan theih ang tawka ropui leh hlimawm thei ang berin Krismas hman kan tum theuh thin.

Kum a thar a, khaw vawt a reh chhoh hnuah Krismas boruak kan thlauh thla a, kan rilru puthmang kan thlak zui a, a tam zawkte’n December thla chhunga midangte tana thil tha tih an duhna kha an dahtha a, nunphung dang daih hmangin an nitin hun an hmang chho ta daih thin a ni.

Krismas boruakin min chenchilh loh hnuah eng vangin nge Isua chu kan hriat zui ngai loh tih te chu kan ngaihtuah ve fo tho a, mahse kan nunphung erawh a danglam phah chuang hlei lo a.

‘Krismas Arsi’ hi kum khat chhungin vawikhat chiah a inlan thin a, vawikhat a inlan zawh chuan a thamral a, kum khat chhung chu hmuh theih a ni leh tawh lo thin a. Hetiang deuh bawk hian mihringte pawh hi kan awm thin a tih theih a, kum tluanin mahni tan kan hun kan hmang a, midangte tan hun kan siam hleithei lo a, Krismas dawn hnaihah midangte tan kan inpe chauh thin niin a ngaih theih.

Mihringte’n Krismas kan ngaihdanah chuan December thla tawplam, Lal Isua pian ni, thlasik khaw vawt tak mai, mi chi hrang hrangin thilpek kan inpektawn hun, tum danga kan tih ngai loh leh kan ngaihtuah ngai loh - midangte tana thil tha tih hun, a tha thei ang bera awm hun niin kan ngai thin.

Kan in cheimawi te, kan rilru puthmang a tha zawnga kan thlak danglam te, ruai theh te, thilpek kan pek te kha Krismas tinuamtu leh tikimtu a ni teh meuh mai a, mahse khatiangah khan Krismas erawh a tawp mai tur a ni lo a, kan nitin nunah Krismas hi awmtir reng thei ila a duhawm dawn hle.

‘Krismas Arsi’ lan lai chauh ni loin, kum tluanin Amah hria ila, Isua khan kan tan Krismas thilpek duhawm em em mai a hnutchhiah a, chu thilpek hlu tak - hmangaihna chu kan nitin nunah chhawm tel tlat ila, khawvel hi a va’n nuam dawn em!

Mihringte inrema kan awm hi Isua duh dan pawh a ni a, mahni chuan kan kal reng thei lo a, kan khawvel zinkawng zawh laiah hian kawng kan bo fo thin a, hetiang hun kan tawng a nih pawhin Amah chuan kawng dikah min hruai thei zel a ni.

Lal Isua pian kha hun rei tak kal tawh niin hriat reng pawh a harsa thin hle a, mahse kan nitin nuna Krismas boruak kan senglut a nih ngat chuan khawvel nuam tak kan siam thei reng dawn a ni.

He was born so far away
So the story's told
We remember Christmas Day
When winter days grow cold

With the time it passes by
We put away the trim
Then we live and wonder why
We can't remember Him

The Christmas star shines once a year
And then it fades away
Keep the spirit in your heart
It's Christmas everyday (Christmas everyday)

It's not the bells and it's not the snow
And it's not the gifts we get
But He was born so long ago
It's easy to forget

Peace on earth, good will too men
But men can't go alone
We get lost along the way
But He can bring us home

Remember Him throughout the year
Without the star above
He left us all a Christmas gift
He left the gift of love

The Christmas star shines once a year
And then it fades away
Keep the spirit in your heart
And it's Christmas every day

Kan nula rim ve kha!

Middle School chhuahsana High School meuh han kai ve takah chuan rilru puthmang pawh a lo inthlak danglam nasa viau mai a. Puitling deuh riaua inhriatna kan nei a, tlangval chetin kan che chho ve ngei kha ania.

Hmeichhe hmeltha tih deuh kan nei ve tan a, a ruka tha tih kha a hunlai chuan kan ngam tawk vel kha ania. Ralkhat atangin an hmel kan hmu a, kan lai em em zel a. Min rawn melh ve nia kan hriat phei kha chuan a tek hian kan tek chhuai chhuai a ni ber a, kha aia nuam leh lawmawm kha he khawvel ram zauah hian a awm thei lo hrim hrim.

Theihtawpin veiin atchilh mah ila, kan va atchilh deuhte khan engmah lah chu an hre ve der si lo a! Biak chu sawi loh, an bulhnaia kal pawh kan ngam thathum lo ania, kawnglaia inpelh dawn te hian a hla thei ang bera pelh kan tum hram hram zel. Chuti chung pawh chuan thlasik lai ai mahin kan la khur nasa zawk thin nia mawle!

Hmeichhia kan inchuh:
Keini thianho kha hetiang lamah chuan kan harh lem lo hle a. Hmeltha tih chu kan ngah mai a, han biak vel kha chu hnai lo tak a ni thung. Sande Sikul banah kan thianpa pakhat pi te inah hian kan kal khawm a, kan inlehkhaden a. Kan hmeichhe hmeltha tih zawng theuh kha lehkhaah kan ziak tlar dul mai a, pakhat te tein kan thawh a, inlehkhaden chuan kan inchuh ta thin a.

Kan hmeichhe man te chu kan chhinchhiah zel a, cha kawt an awm hunah emaw, duhtawk chin kan neih hnuah emaw khan kan hmeichhe neih theuhte chu kan thlirho a, kan Top 5 zinga mi midangin an man a nih chuan kan inthleng kual ta thin a. Kan duh deuh bik kha chu kan thleng huai ngam thei viau a, a ‘sipisial’ deuh phei kha chu hmeichhe panga pawhin phur takin kan thleng tawh mai thin.

Kan duh ber mantu kha a chang chuan a lo induh ve tlat mai zel a, rilru a va’n hah duh tak aw! Kan indawn ngat ngat a, a tawlh zawk nih kan hreh ve ve tawh thin si a, rei fe chu hetiang hian hmeichhia kan inchuh ta thin a, a hlimawm duh angreng phian.

Khatiang hunlai khan pali kan ni tlangpui thin a, pathum chauh awm chang pawh a tam a, kan hlimtlang thei phian a. Kan headquarter kha veng chunga awm tih takah vengchhung hmundang a lang zau thei em em mai a. Tukverhah kan dak a, a chang chuan enlenna kan inchhawp a, a ruka kan hmuhtaih deuhte khawlaia an kal emaw, an kawt vela an awm emaw kan hmuh fuh chuan phur zetin enlenna hmangin kan thlir thin a. Kan hlim ve veng veng zel tho!

Kawngka kik mawlh mai hi:
Tlema hun a kal leh deuh hnuah kha chuan rilru kan tipaukhauh lui ve ta a, tlema kan lo ‘ralkhat tawih’ deuhte ina len ngei tumin kan insangmar ve tan a. A hma daih atangin kan han infuihpawrh tawn vel a, kan sawi phur chiam a, a hun a rawn thlen meuh hi chuan kan zuzi titih fo mai a. Mahse, lenluh ve tak rawih chu kan nei ve nual tho.

Kan thawmhnaw nalh deuh ber nia kan hriat kan ha a, kan rim turte kawngka bulah kan han ding thap phawt a. Lut hmasa tur kan inhnawn hmasa phawt a, chutah kawngka kik tur kan inruat leh te te a. Nghakhlel deuh si, huphurh deuh bawk siin dim deuhin pakhatin kawngka a’n kik a, midangte chu kan lo biru titih hman thin a. Kawngka kik hnua tlanchhiat tak daih chang pawh a awm nual!

Kawngka kik hi thil huphurhawm tak zawng a lo ni tih ka hriat chianna chu, kan thianpa pakhat hi amahin nula rim turin a chhuak a. Kan thian zinga pakhatin a lo enthla ru a, a hmeichhe rim turte kawngka bulah chuan rei ngial a ding a. Kawngka a kik dawn uk a, a huphurh lutuk chuan a kut a lalet leh zuk thin a. Chutiang chuan pawnah a inkhap a inkhap mai a, darkar chanve vel zet chutianga a awm hnu chuan a tawpah a kik ve ngam hram niin a enthlatu hian a sawi. Huphurhawm duh deuh asin!

A chet that reng theih bik loh:
Hlau leh khur chunga nula ina leng kan nih vang nge pawh ka hre lo, phak tawka nungchang mawi lantir hram hram tum pawhin kan che tha reng thei bik lo a. Theihpatawpa insum pawhin chet chhiat chang kan nei fo mai a, tunhnuah nuihzatthlak viau mahse a hunlai chuan nuih a za duh lo ania aw!

Tumkhat chu Chaltlangah kan carol a, thingpui in turin min lo chelh a, keini pawh chuan thuthmun kan rem ve nghal mai a. An fanu, a hma atang tawha hmeltha kan lo tih ruk ve tak mai chuan thingpui leh cake a rawn sem a. Kan thianpa pakhatin cake a la ve tur chu, an cake zai kha an lo zai bung chiang vak lo a, an in ‘tira mei kai’ ta mai a, kan nui ri ngam chiah si lo, kan thianpa hmai sen awp awp hmuh phei chuan nuih insum a va han har tehreng!

Hmun dang lehah thingpui an rawn sem a, hmeh turin dawhkanah vaimim an rawn chhawp bawk a. Kan thianpa pakhat chuan vaimim chu a va ban a, a khak sual palh emaw ni, vaimim pakhat chu a lum thla ta a, thutthleng hnuaiah a lut daih a, nuihza insum chunga inmelh hrek hrek bak tih theih a tam lo khawp mai.

High School vela ka kalpui thin pakhat kha kan thian zinga miin a lo haw lo riau hi a lo nia, ‘Kawi 6-naah’ (Kan headquarter atanga kawng kawi 6-naa an awm avangin hetiang hian a hming kan phuah) kan lenpui ve tawp mai a. A changtupa ber khan kan len hmasak ber zan kha theihnghilh har a ti ve ngawt ang.

Kan haw dawnin a changtupa leh kan thian dang pakhat an kal hmasa a, kei leh a changtunu chu an hnungah kan kal a. An gate kha thir ania, a vaia hawn ngai loa mihring leng tawk vela hawn theihin an siam a. A kal hmasa te chuan a te zawk chu an hawng a, kan hma chiahah a changtupa chu gate ah chuan a chhuak dawn tihin a changtunu chuan, “Gate kha a hniam a, kun deuh a ngai ania,” a ti hman chiah a, a ri bawl mai a. Kan han en chian chuan mark score tum ber mai chuan kun nachang a lo hre pek lo a, gate-ah chuan intauh hi a lo nia. Kan nula rim ber chu a nuih a za khawp mai a, mahse a insum thei phian a, a nui chhuak ta bik lo.

Kan hmaa kal erawh a nuih a za ve lo chiang khawp mai. Amah hi ngo lampang a nih vangin a zak lutuk, beng sen tawn tawn pawh chiang takin a hmuh theih a, hnunglam a rawn hawi leh tawh lo reng reng. Kan kal liam hnuah a tawng chhuak ngam leh chauh a, a lu chu na ti mahse a tuai ngam lawk lo zui.

Hetah tho hian chanchin dang pakhat sawi tur a awm leh a, (Mak deuh mai chu thingpui in dawn hian kan helhhawlh thin nge pawh ka hre lo, che chhia an awm fo mai) thingpui kan in dawn a, thingpui hang leh kurtai an rawn chhawp a. Kurtai chu a hul lutuk lo a, tlema diak deuh a nih avangin a sawka sawk deuh a ngai a. Kan lenpui ber chuan a la ve dawn a, sawk nachang a hre ve chiah lo aniang chu, kurtai chauh lak tum khan a plate chawpin a chawi kang vah bawk a. Hemi tum hi chuan tlemin kan lo tlangnel ve ta deuh bawk a, kan nui ve ham ham tawh mai.

Kan thian dang pakhat nula rim kha chu a huai bik asin. A hmeichhia kha a nu u te inah lehkha zirin a awm a, an exam lai te a nih avangin a awmna te khan inleng neih kha an remti chiah lo a. Kan thianpa chu a kal lui tho a, gate-ah in neitunu chuan a lo dawngsawng a, “Lehkha zir a ngai a, len kan remti lo,” a lo ti hmak mai a.

Thianpa lah kha a duai lo, “Ka leng dawn lo, tui ka in ringawt dawn asin,” tih pahin in chhung lam chu a pan lui ta tho a. In neitunu chuan tih vak ngaihna a hre bik der lo. ‘Tui in lawk’ chhung kha chu a rei ta phian a, darkar 3 vel zet chu a ni vel ang. Khami chhung khan a sawi anga tui a in char char a nih ngat phei chuan a pumpui chu a lian fu ta ve ang!

A dang neuh neuh:
Urlawk zanah hmeichhia kan sawm ve ngei a, ei tur kan siam hmin tawh tihin an nu leh pate’n an in lama insawn tura min rawn ngen leh tak avangin kan ei tur siam kan dahtha leh a, Krismas zawh hnu daiha kan ei tak thu vel kha chu sawi tel tawh lo mai ila.

Kan thian pakhat ‘star’ deuh te’n Dawrpui taxi stand ep chiaha dawr an neih laiin chhunah an lut ve tawp mai a, a hmeichhia amah chauhin a lo awm bawk nen, an zak leh si, a hmutai tu ber khur nasa lutuk tawng tha thei lo tih vel pawh sawi chhuah chi a nih ka ring lo.

Pakhat dang leh zan rei tan tawh tihin a bialnu te ina len a tum, a bialnu pain rukru emaw a tih phei kha chu ka zep tlat dawn. Kan thianpain an nu a ruk tumin an thawm hriat an hlau khawp mai a, motor pawh an in bul velah an tinung ngam lo a. A hmeichhia zawkin hmanhmawh lutuka motor a nempui sawk sawk pawh kha mi hriata sawi chi pawh a ni lo, an zak lutuk ang.

NEW YEAR RESOLUTION: Kum Thar Thutiam Hlen Loh A Awl

Kum a thar ve leh ta a, khawvel hmun hrang hrangah mi chitin chitangin thu an tiam nasa leh viauin a rinawm a. Kei ngei pawh hian kum danga ka lo tih ve thin ang bawkin ka tiam ve leh ta chu ania, eng chen nge ka tihhlawhtlin ang tih chu ka sawi thei bik lo.

Hetianga kum thar thutiam neih hi a intanna a rei ve tawh viau mai a. A tlangpuiin khawvel hmun hrang hrangah kum thar thutiamah hian a hma aia tha zawka nun tumna lampang a tam hle.

Babulon mite khan kum a thar rual hian mi thil an hawhsak te chu pek ngei an tum thin a, leiba an neih pawh rulh vek an tum hram hram thin. Rom mite pawhin kum thar tirh hian an pathian Janus (January thla an phuah chhan) hnenah thu an tiam thin.

Hun a kal zel a, thu tiam dan pawh an her danglam ve hret hret a, tun thlengin kan la chin chhunzawm ta zel a. Tunhnuah chuan American ho hian an uar lehzual niin a ngaih theih a, kum zabi 21 hnulamah a tlangpuiin American zinga 40% te chuan kum thar thutiam hi an nei ziah anga chhut a ni.

Thu tiam thin te:
Kum zabi 20 na tirlam atang khan mi tam zawkte chuan nasa zawka mi harsate tanpui an intiam thin a. Hei bakah hian kan chenna chhehvel a hma aia ngaihtuah leh duat zawk an tiam fo bawk.

Hemi hnulamah hian mahni taksa tha zawka enkawl tuma intiamna an uar chho hle mai a. Ei leh in hrisel, rihna tihhniam, insawizawi nasat, tha zawka chaw ei, zu in tlem, meizial zuk bansan, kut tin seh tawh loh tih te a ni nawk hlawm a.

Rilru puthmang her danglam pawh an ching viau bawk a, a eng zawnga thil thlir tam te, a hma aia nuih hnem te leh nuam ti taka nun hman dan zir te an tum bawk thin.

Mi thenkhat chuan sum leh pai lama hmasawnna hmel hmuh tumin thu an tiam a, an thutiam hi an bawhzui thin a. Leiba neih loh, pawisa khawl leh dahkham neih te an tum thin.

Zirna leh eizawnna lama hmasawn tum an awm bawk a. Mahni hnathawh lai chu a hma aia tha zawka thawh te, an hnathawh lai aia tha zawk thawh tum te, mahnia bul tan tum te an awm nawk bawk a ni.

Zirlaite chuan a hma zawng aia result tha zawk neih te an tum bakah, zirna tha zawk neih te, thil thar tam zawk hriat belh te, lehkha zir ngawrh lehzual te an tum thin.

Heng bakah hian thutiam dang chi hrang hrang - mahnia felfai lehzuala inrelbawl, rilru hahna tihbo, phunchiar loh, hun hman thiam, mahnia intodelh, TV en tlem, video games khelh tlem tih te a ni nawk hlawm.

Thenkhat chuan midangte tana hun hman hnem lehzual an intiam a, Kohhran leh khawtlang thiltiha tel hnem, midangte tanpui tura pen chhuah, rualpawl lehzual, zau zawka thian kawm dan zir, thian thar siam, chhungkaw tana hun hman tam, nupui/pasal neiha fa neih, tawngtai nasa lehzual tih te a ni hlawm bawk a ni.

Hlawhtling/hlawhchham:
Kum tin hian thutiam nei hlawm thin mahse hetianga kum thar thutiam nei te hi an thutiamah an ding hlen ngai chuang lo a. University of Bristol in mi 3000 an zir chiannaah chuan 88% te chuan an thutiam an tihlawhtling lo a. A tirah heng mi 3000 zinga 52% te chuan an thutiam hlen an inrin thu an sawi ve bawk a, an vai chuan an tihlawhtling lo chiang hle a ni.

An zir chiannaah hian mipa te chuan thutiam an hlen tha zawk a, 22% velin an tihlawhtling a. Hmeichhe zinga 10% vel chauhin an kum thar thutiam an tihlawhtling ve thung a ni.

Kum thar thutiam zinga tihhlawhtlin harsa zual nia an thlan chhuahte chu - rihna tihhniam, meizial zuk tawh loh, thil thar zir, ei leh in hrisel zawk, leiba neih loh leh pawisa khawl, chhungkaw tana hun tam zawk hman, hmun danga zin kual, rilru hahna tihtlem, midangte tana inpek, zu in tlem.

Keipawhin ka tiam ve thin:
“Mi pawhin an ti ve tho alawm” ti rilru chungin kum thar thutiam hi chu ka’n nei ve fo mai a, a hlawhtling tluantling khat angreng viau lehnghal! Mahse, engemaw chen a hlawhtling ve tho a, tiam loh ai chuan hma ka sawn tho tho tiin ka inthiamchawp ve mai zel.

January 1, 2013 khan huphurh ru deuh chungin ‘meizial zuk ka sim tawh ang’ ka ti ve pawp mai a. Meizial zuk ruk hi ka ching hma ve angreng si a, eng chen nge ka nghei theih dawn tih lampang pawh ka ngaihtuah tha duh lo a.

Nikhat pawh rin aiin a lo rei duh viau mai hi a lo ni a, mahse ka lo tiam ve tawh si a, inngaihtuah lunglen loh hram ka tum ve tang tang a. Ka bulhnaia midangin an zuk te hian a rimtui ka ti em em mai a, phihthlaksak a han fawh ve mai a chakawm duh khawp mai! Harsa chu ka va han ti tak e aw!

January thla laihawl chu ka nghei thleng thei hram a, a bak chu ka tih thin chu ka ti ve leh ta mai a. Mahni thutiam bawhchhiat chu nuam ti bik chiah lo mah ila, ka meizial zuk chakna khan min hneh bawk si a, ka inthiamchawp leh ta char char mai a. ‘Thla chanve lai ka nghei hman a, a hrisel hrim hrim’ te ka ti leh ringawt zel.

A hma pawhin kuhva nghei ka lo tum tawh bawk a, ka hlawhtling rei lem chuang lo khawp mai. Kuhva pawh hi ka ei nasa khawp mai a, nghei chu harsa ka ti ngang mai.

Ka la nghei rei ber chu a hranpaa intiam em em loin ka nghei thut mai a, thla 3 leh a chanve chu ka nghei hman a, mahse ka ha a na ta riau mai a, a nat mai bakah a za tel bawk si a. Ha pawh ka nawt tha ngam lo lek lek ta mai a, thil ei a harsa bawk si. Chuti teh hrep chu tiin ka inngaihtuah a, keimah hian nghei duh mah ila, ka ha hian insawizawi nan a lo mamawh a nih hi ti rilru chungin ka ei leh ta a. Tun thleng hian nghei chu ka sim ta vang vang rih a nih hi!

Kuminah pawh ka tiam leh:
2014 a inher chhuak a, a hmain ka hlawhtling khat viau tih hre reng chungin thutiam chu ka nei ve leh ta tho a. Tun tum chu kum dang aiin ka tumruh tawh zawk a, hlawhchham ka tum tawh bik lo reng reng.

Khaw vawt a reh deuh hunah ‘morning walk’ ve ngei ngei ka tum a, hei kher hi chu ka huphurh bik lo khawp mai. Pathian zarah chaw ei tui loh te hi ka nei khat khawp mai a, insawizawina hun ka neih loh em avang hian ka dul bawr vel hi a thang duh riau mai a, inlak pian nalh leh a pawimawh ka ti tlat.

Dul pawng chu thuhran lo ni ta se, step kal hi ka taksain a mil lo sawt riau mai a, a zialo ka ti ve ta deuh a, theihtawp chhuah loh chi pawh a ni lo. A hma aiin ka chaw ei a tui ang tih erawh ka hlau ru viau thung.

Ka piana hnulama ka la tih ngai miah loh tih ka tum mek bawk a. Kumin chhung ngeiin Bible chhiar chhuah ka tum ve viau a, hei pawh hi ka tihhlawhtlin ngei ka inbeisei tlat bawk.

Sande Sikul kai tha lawmman ka dawng ve fo thin a, Naupang Sande Sikul zirtirtu te ka lo ni ve tawh thin bawk a, mahse Bible hi a indawt thlapin vawikhatmah ka la chhiar chhuak miah lo mai a. Hetiang a nih avang hian tih ve ngei ka duh tlat. Nitin ka chhiar ziah tawh dawn tihna a ni mai.

Eng pawh thleng se...:
‘Tum dangah pawh ka hlawhtling tawh si lo a’ tih te, ‘Tiam tawh loh law law a tha zawk ang a’ tih te hi rilruah chuan a lut ve tho a. Mahse, khatiang ngaihtuahna avanga ka thil tum thulh chu ka tum bik lo chiang khawp mai. A hmaa ka sawi tawh ang deuhin, hun rei tak ni lo mahse, a hma aia hma ka sawn hretna pawh kha a hlu ka ti hrim hrim mai a, ka inchhir lo a, ka inthiamlo lem lo.

Kumina ka thutiam hi chu sawi ve reng rengah pawh tihhlawhtlin ngei chu ka la tum khawp mai a. ‘Ka thei ta lo a nih pawhin...’ tih lampang chu ka sawi dawn lo a, ka ngaihtuah dawn lo hrim hrim. Hnampui zawk pawhin an lo tiam thlawn ve fo tawh a, kawng hrang hrangah hnam ropui zawkte tluk phak an har a, chuvangin kum thar thutiam hlen chhuah chungchangah kher hi chuan tluk phak mai ni lo, lehpelh hi ka va han tum tak em!

Do They Know It’s Christmas

Hringfate’n kum tluana kan nghahfak Krismas chu a rawn thleng leh ta der mai a. He hun lawmawmah hian hlauh nei miah loin, zalen takin kan awm leh thei dawn a. ‘Thim’ kalsanin ‘eng’ hnuaiah kan awm theuh dawn a, hmun tinah hlimna leh lawmna kan thehdarh zel ang a, thenrual tha te, chhungkhat laina te nen inremin kan awm vek dawn a ni.

Mahse....

Kan dinhmun anga ding ve thei lo an awm tih theihnghilh loh a va’n tha em! Heng mite tan hian theihtawp chhuaha kan tawngtai a ngai. Kumtir atanga kan lo thlir, hun ropui tak a lo thlen ruala mi chanhai te tana rilru sen chu a harsa viau a, mahni nuam tih zawng um kan chak theuh bawk si.

Hawi chhuak ila, pawnlamah hian khawvel dang a la awm a, he khawvel hi hlauhna leh hrehawmna hlirin a khat a. An awmnaa tui luang awmchhun chu mittuiin an biang chat deuh a luan thip sep sep hi a ni mai a. An tan chuan Krismas dar a awm ve lo, an dar hriat ve chhun chu thihna dar ri a ni ringawt. An dinhmun anga kan ding ve lo hi Pathian hnena lawmthu sawi mawlh mawlh tur kan va ni chiang em!

Krismas laiin Africa ah chuan vur a tla ve dawn hauh lo. An thilpek dawn ropui ber pawh nunna a n

i ringawt, a bak beisei tur a awm lem lo. Thlai a to tha thei lo a, ruah a sur khat bawk si, lui luang hmuh tur lah chu a awm meuh lo lehnghal! Anni hian Krismas a rawn thleng tih hi an hre ve ngut ang em le?

Dinhmun tha zawka dingte hian he hun lawmawm a rawn thlen hian kan vanneihzia hre thar ila, mi chanhaite hi theihnghilh lul lo ang u. Kan theih ang tawkin heng mite hi tanpui ila, an tana inpekna hunah he Krismas duhawm tak hi hmang theuh ang u.

Khawvel ram dangah chuan December ni 25 chu a vawt viau hlawm a, mahse Africa hmun tam zawkah erawh nipui hun an hmang deuh fur thung thin. He hla hian nuam ti taka Krismas kan hman lai hian khawvel lehlamah chuan riltam leh hrehawm ti takin mi tam takin hun an lo hmang ve mek a ni tih min hriattir a. Heng mite tana kan theih ang anga kan hun, kan thil neih te pe ve turin min duh a ni.

October, 1984 khan BBC ah Michael Buerk report buatsaih - Ethiopia rama tam tla chungchang chipchiar - chu an tichhuak a. Irish singer Bob Geldof chuan he report hi a lo en fuh a, a rilru a khawih em avangin Ethiopia ram mipui tana sum tuak dan ngaihtuah a tum phah a ni.

Ultravox member Midge Ure a bepawp vat a, ‘Do They Know It’s Christmas’ tih hla an phuah nghal a. Geldof hian November thlaah ama album thar tilar turin BBC Radio 1 ah hun a nei a. A hun a rawn thlen hian DJ Richard Skinner nen an inkawm a, ama album thar chungchang engmah sawi loin sum tuakna tur ‘single’ an phuah fel tawh chungchang hlir chu a sawi hlauh a. Hetianga a tih atang hian mi beng a thlang nghal der mai a.

The Boomtown Rats singer Bob Geldof leh Midge Ure te hian musician an fawm khawm nghal char char a, hetianga an buai chhoh lai hian media lamah pawh sum tuak an tum thu leh sum an tuak duh chhan te hi an tarlang nghal chuai chuai bawk a.

Mi chi hrang hrang a biak kual fe hnuah Bob Geldof chuan British leh Irish rimawi khawvela langsar deuh deuhte chu a thurualpui thei a, band thar duhawm deuh mai ‘Band Aid’ chu an din fel ta a ni.

Ethiopia ram retheihzia a hriat atangin thla khat vel erh awrh chauh a liam hman a, November 25, 1984 khan ‘Do They Know It’s Christmas’ chu Sarm West Studios, Notting Hill, London ah an record a. Hla an record atanga ni 4 hnuah an tlangzarh zui nghal bawk a ni.

He hla hi miin an duh hle mai a, an tlangzarh atanga kar khat chhung chauhin maktaduai 1 chu an hralh nghal der a. UK chart ah kar 5 chhung chu a zawnin No. 1 a ni zui bawk a, Britain chhungah ringawt pawh copy maktaduai 3.7 zet an hralh a ni.

1997 thleng khan UK chart an tih tirh atanga single hralh tla ber a ni chho ngar ngar a. 1997 khan Diana, Princess of Wales tana Elton John sak ‘Candle In The Wind’ khan a rawn khum ta a. Tun thleng hian pahnihna dinhmun chu a la hauh reng tho.

Khawvel pumpuiah ‘Do They Know It’s Christmas’ hi maktaduai 11.8 chu an hralh chhuak hman tho a ni.

Bob Geldof hian a tir takah chuan £70,000 vel bak hmuh a inbeisei lo hrim hrim a. Mahse, an han tlangzarh chiah a, an beisei let engemawzat an lalut thei a. He hla vanga pawisa an hmuhte chu Ethiopia ram mipui tanpuina atan an hmang zel a.

1983-1985 chhunga Ethiopia rama tam tla tuartu an tanpui hi duhtawk mai loin, 1989 khan Band Aid II an din leh a, he hla bawk hi an tichhuak thar leh a. 2004 khan Band Aid 20 din lehin, tan tuarte tan sum an tuak leh bawk a, hemi tum hian maktaduai 1.17 zet an hralh leh a ni.

Do They Know Its Christmas Time
- Band Aid

It's Christmas time
There's no need to be afraid
At Christmas time, we let in light and we banish shade
And in our world of plenty we can spread a smile of joy
Throw your arms around the world at Christmas time

But say a prayer
Pray for the other ones
At Christmas time it's hard, but when you're having fun
There's a world outside your window
And it's a world of dread and fear
Where the only water flowing is the bitter sting of tears
And the Christmas bells that ring there are the clanging
chimes of doom
Well tonight thank God it's them instead of you

And there won't be snow in Africa this Christmas time
The greatest gift they'll get this year is life
(Oooh) Where nothing ever grows
No rain nor rivers flow
Do they know it's Christmas time at all?

(Here's to you) raise a glass for everyone
(Here's to them) underneath that burning sun
Do they know it's Christmas time at all?

Feed the world
Feed the world

Feed the world
Let them know it's Christmas time again

Feed the world
Let them know it's Christmas time again

Inspirational Story - II

VANRAM A HLA LO

A sam chu a nu chuan mawi deuhin a tawnsak a, a kawr zinga a duh ber mai chu a ha a. Chu kawr a duhna em em pawh a suihna a awm vang a ni.

Phur takin a insiam a, vawiin chu an sikulah ‘Pate ni’ (Daddy’s Day) an hmang dawn a, hei vang hian a phur em em mai a.

Kal hlan a nghahhlelh viau laiin a nu chuan kal lo mai se a duh viau thung a. Pa hruai tur a nei si lo a, naupang dangte chuan an hrethiam ve dawn si lo a, an hmuhsita an nuihzat a hlau a ni.

Mahse, chu hmeichhe naupang chuan kal a tum nghet tlat mai a. Mi ngaihdan tur kha a ngaipawimawh duh lo, a hun a thlen chuan a sawi tur a hre lawk vek tlat.

Heti tak hian inringtawk mahse a nu chu hlauhthawnna hlirin a la khat thung a. Hetiang hun a hmachhawn tur hi a huphurhpui em mai a, sikula kal ve lo mai tur chuan a ti leh a, mahse a hlawhchham chiang hle.

A fanu chu sikul lam pan chuan a liam ta a, a sikul kalpuite hnena a pa, hmuh theih loh, rawn be ngai lo chanchin sawi hun chu a nghakhlel tawh em em mai a.

An sikul a thleng a, naupang dangte chu an pate chuan an kalpui hlawm a, thutthlengah chuan an lo thu thup mai a. Naupangho lah chuan nuam an ti a, an phawklek tlang hlawm hle a.

Hun an hmang tan a, zirtirtute chuan naupang chu pakhat te tein an kochhuak a, an pate chu midang hnenah an hmelhriattir a, chumi zawh chuan an pate chanchin an sawi zui zel a.

Naupangho chu a indawtin an rawn ko zel a, phur takin an pate chanchin chu an rawn sawi zel a. A tawpah zirtirtute chuan chu hmeichhe naupang chu an rawn ko ve ta a. A thiante leh an chhungte chuan an en thap mai a. A pa chu an zawng ruai hlawm a.

“Khawiahnge a pa hi a awm ve a?” mipa naupang pakhat hian a rawn ti lang lang a.

Naupang dang pakhat chuan, “A nei ve lo aniang,” a lo ti vat a.

Tlarhnung atang chuan pa pakhat hian ring deuhin, “A pa hi a laktlak vak loh aniang. Mahni fanute tawiawm nachang pawh hre hlei lo,” a lo ti ve leh bawk a.

Chutianga an tawng vel chu hre vek mahse eng vakah a ngai duh miah lo a, dawhsan lam chu nui sang chung hian a pan phei a, a thiante chu a nuih ver ver mai a.

Dawhsanah chuan a ding a, a kut chu hnunglamah a suih a, mipui chuti zat hmaah chuan ding mahse huphurhna a nei hauh lo a. A insiamrem zawh chuan muangchangin a rawn tawngchhuak ta a.

“Vawiinah ka pa a rawn tel ve thei lo a, mi tam takin a awmna in ngaihven hle tih pawh ka hria a. A rawn tel ve theih loh chhan chu a awmna a hlat em vang a ni a. Ka bula awma, helaia rawn tel ve pawh a chak em em tih ka hria,” a ti phawt a.

“Amah chu hmu lo mah ula, ka pa chanchin hi hrilh ve hrim hrim che u ka duh a. Eng ang takin nge min hmangaih tih hi in hriat ve ka duh a ni.”

“Ka pa hian thawnthu min hrilh te hi nuam a ti em em a, thirsakawr chuan dan te min zirtir a. Rose par sen mawi tak min pe thin a, lehkhachaih chaih dan te min zirtir thin.”

“Ei tur tui tak tak te min leisak thin a, vur te kan eidun thin a. Tunah hian ka pa chu hmu thei lo mah ula, in hmaah hian keimah chauhin ka ding hauh lo ania. Ka pa chu hmun hla takah awm mahse ka kiangah a awm reng thin tih ka hria, amahin min hrilh tawh tlat. Ka thinlungah hian kumkhuain ka pa chu a awm reng ang.”

Chumi a sawi zawh rual chuan a kut te tak te chu a la chho a, a awm zawnah chuan a dah a. A kawr duh ber chhanah chuan a thin phu dup dup chu a hre thei a.

Mipui hnunga ngawi renga ding, a nu mittui chu a far zung zung mai a. A fanu chu chhuang takin a en ngawih ngawih a, a kum phu loin a kamchhuak chu ropui a ti hle mai a.

Hmeichhe naupang chuan a kut chu a la thla leh a, mipui lam chu a en ran mai a. Zawi deuh sap hian thu a sawi zawm leh nghal a.

“Ka pa hi ka hmangaih em em a, ka tan chuan arsi eng ber a ni a. Theih se chuan tunah hian ka bulah a rawn ding ngei ang a, mahse vanram chu hmun hla taka awm a ni si a.”

“A chang chuan ka maimitchhing a, ka bulah hian a awm ve niin ka hre thin,” tih pahin a maimitchhing nghal a, a mitthlaah chuan a bula a pa ding chu a hmu zui a.

A nu chuan a bul vela awmte chu a en a, naupang leh puitlingte pawh chu an lo maimitchhing ve vek tih a hmu a, mak a ti em em mai a.

Chulai hmuna awmte rilruah chuan eng nge awm tih leh eng nge an hmuh tih chu tumah an inhriatpui lo. Thawm chu a reh chiang hle a, tumah han che vel pawh an awm lo.

Chutianga a reh thap lai chuan hmeichhe naupang chuan zawite hian, “Ka pa, ka kiangah i awm tih ka hria e,” a rawn tichhuak a.

A hmaa ringhlel leh nuihzat deuha chu hmeichhe naupang lo thlirtute chuan an rilru an thlak chiang tawh hlawm hle mai a. Rinhlelhna emaw, hmuhsitna emaw a awm tawh reng reng lo. An zavaia an maimitchhin daih hlawm avangin hmeichhe naupang hmaa dawnkan chunga rose par sen lo awm pawh chu tu dah nge tih sawi thei an awm hauh lo.

Chumi nia kalkhawmte chuan vanram chu hmun hla taka awm a lo nih lohzia an hrechhuak thar chiang hle.

Inspirational Story - I

NAUTELEM LEH ROSE VAR

Eng eng emaw lei tumin dawr pakhatah hian ka lut a, dawr nghaktu chuan mipa naupang pakhat hi pawisa a lo pekir mek a. Chu mipa naupang chu kum 5 emaw, kum 6 emaw vel bak a la ni lo tih a hriat theih a.

Dawr nghaktu chuan, “A pawi khawp mai, mahse i pawisa neih hian nautelem leina a daih tlat lo,” tih pahin naupang hnenah pawisa chu a pe a.

Mipa naupang chuan dawr nghaktu chu a en a, “Ka pi, ka pawisa neih hi a tawk lo tak tak em ni?” a ti chuai raih mai a.

“Ka nau, he nautelem leina daih hi pawisa i nei lo tak tak alawm,” tiin a lo chhang a. Mipa naupang chu a dinnaah chuan minute 5 lo la ding turin a ti a, hmanhmawh deuh hian a kalsan nghal a.

Chu mipa naupang chuan nautelem chu a la keng reng a. A tawpah chuan a bulah chuan ka va phei a, nautelem chu tu tana lei nge a tum tih ka va zawt ta chawt a.

Mipa naupang chuan, “He nautelem hi ka nauin a awt thei em em mai a, Krismas hunah Krismas Putarin a pek ngei a rin thu min hrilh tawh nghe nghe a,” a ti a.

Kei chuan, “Lungngai reng reng suh, Krismas Putar chuan i nau chu a rawn pe tak tak maithei asin,” ka ti ve ngawt a.

Mahse lungngaih hmel deuh hian, “Ni lo, Krismas Putar chuan tuna a awmnaah chuan a pe thei tawh lo. He nautelem hi ka nu ka pe ang a, ka nau awmna ka nu a kal hunah ka nuin a pe thei chauh ang,” a ti a.

Hemi a sawi lai hian a mitmeng chu a danglam vek a, a lungchhia tih hi a hriat reng mai a. “Ka farnu chu Pathian hnenah chawl turin a kal tawh a. Ka pain ka nu pawh Pathian hnenah hian a kal tep niin a sawi a, chuvangin ka nu hian ka farnu hnenah nautelem chu a ken nghal theih ka ring a,” tia zawi sapa a sawi chuan ka lungphu chu a chawl mai dawn emaw ka ti hman a.

Min en pah chuan, “Ka pa hnenah ka nu chu la kaltir rih lo turin ka ngen a. Dawr atanga ka kir leh hma chu min lo nghak turin ka duh a ni,” a ti zui a.

Chutah, ama thlalak min entir a, thlalakah chuan a nui deuh sang a. “Ka nu chuan ka thlalak hi keng tel se ka duh bawk a. Ka thlalak a ken chuan min theihnghilh thei dawn lo a.”

A sawi zawm zel a. “Ka nu hi ka hmangaih a, min kalsan loin ka bulah awm reng se ka ti a. Mahse, ka pain ka farnu bula awm turin a kal a ngai tih min hrilh bawk sia.”

Nautelem chu mittui parawl kuang chungin a en leh ngawih ngawih a.

Rang deuhin ka wallet chu ka ban nghal a, mipa naupang hnenah chuan, “I pawisa chu chhiar tha leh ang hmiang. I pawisa neih khan nautelem leina chu a lo daih maithei asin,” ka ti a.

“Awle,” a ti mai a, “Nei daih thei ila ka va’n ti e.”

A pawisa chu kan chhiar ta a, a hmuh loh lai chuan ka pawisa chu ka telh belh a. Nautelem man chu a daih mai bakah tlem chu a la bang nghe nghe a.

Kan chhiar zawh chuan mipa naupang chuan, “Lalpa, ka mamawh tawk pawisa min pek avangin ka lawm e,” a ti chhuak a. Min en pah chuan, “Nizanah ka mut hmain Pathian hnenah ka farnu nautelem leina tur hi ka dil a. Pathianin ka tawngtaina kha a lo hre tak tak a nih hi!”

“Ka nu ta tur rose var leina tur pawh ka duh lutuk a, mahse Pathian hnena thil tam deuh dil vak vak chu ka inthlahrung ve bawk sia. Mahse, ka dil ngai miah loin rose var leina tur pawh min pe nghal a. Ka nu hian rose var hi a ngaina lutuk a.”

A hnu deuh chuan dawr neitunu chu a rawn kir leh a, kei chu dawr atang chuan ka chhuak ta daih a. Hmundangah ka mamawhte chu ka en ta daih a. Ka rilruah mipa naupang kha a cham reng mai a.

A hnu deuh chuan nihnih kaltaa chanchinthara an thil puan kha ka hrechhuak a. Zurui pakhatin a truck khalh laiin nu pakhat leh hmeichhe naupang chuanna car a sut thu kha ka ngaihtuah chhuak zawk a.

Hmeichhe naupang chu an insutna hmunah chuan a thi nghal a, a nu pawh a dinhmun a tha lo hle a, khawl hmangin a nunna chu an la chelh hram hram chauh a ni a. A tha chhuak thei tawh dawn lo tih an hriat avangin a chhungte chuan khawl chu tihtawp mai an rilruk tawh nghe nghe a.

Hemite chhungkua hi nichina mipa naupang chhungte kha an ni thei ang em?

Mipa naupang nen kan intawn atanga nihnih hnuah chuan chanchinbu ka chhiar a, khawl hmanga a nunna an chelh kha a thi ta nge nge tih an lo ziak a.

Ka chhiar zo chiah chu hmanhmawh deuhin mitthi vuina hmun lam pan chuan ka kal nghal vat a. Kalkawngah chuan rose var bawr lian tha tak hi ka lei nghal a.

A vuina hmun ka va thlen chuan chu nu chu kuang chhungah an lo dah a, an lo la chhin lo a. A kutah chuan rose var hi a lo keng a, a awm zawnah chuan mipa naupang thlalak leh nautelem chu an lo dah bawk a.

Ka rose par lei chu kuang bulah chuan hmanhmawh deuh hian ka va dah a, rang takin ka chhuak leh nghal vat a. Ka mittui chu dan rual loh hian a rawn sur zung zung mai a, ka nun chu a inthlak danglam chiang kher mai.

Kha mipa naupangin a nu leh a farnu a hmangaihzia kha tun thleng hian a mak ka ti tawp thei lo. Khatiang taka inhmangaih kha driver zuruiin second reilote chhungin a lakbosak ta vek mai chu a ni sia!!

Hnathawh Zak Suh

Khawvel a changkang zel a, thalaite hawiher leh rilru puthmang pawh a inthlak danglam ve zel a. A tha lam a awm laiin a tha lo lam pawh a awm tel ve zel lo thei lo a. Thil chi hrang hrang zinga ka vei ve em em pakhat - hnathawh zah - chauh hi ka’n thur chhuak teh ang.

Changkannain min hual vel chuan kan nun dan te kan her rem ve zel a tul thin a. Hun engemaw lai khan thalaite zingah hnathawh zak tlat, mi hnathawk pawh nuihzat deuh tlat an awm thin a. Mahse, tunlai thalaite zingah chuan hetiang rilru pu hi an tlem leh ta tial tial niin a lang a, thil lawmawm tak pawh a ni.

Tunlai thalai tam tak chuan mahni phak tawk hna an chelh fur tawh a, hmasawnna duhawm tak a ni a tih theih a. A hma deuha hnathawh zak tlat te, thiante hnathawk nuihzat chingte kha chu an reh ve tial tial bawk. Nakin zelah phei chuan a reh hmak theih a duhawm hle mai a, mi hnathawk nuihzat thinte hian anmahni kha an nuihzatthlak zawk daih a ni tih an hre der si lo!

Mahni eizawnna tur pawh ngaihtuah peih lo, chhungkaw mamawh pawh ngaihtuah ngai lo, inchhung mamawh lam tum lo, gas lak te, ration lak te, bungraw thiar takngial pawh peih lo ho hi a nihna takah chuan an hmuhsitawm em em a. Nu leh pa thawhchhuah sa ring ringawt, mahnia engmah tak tak thiam si lo, hawi sang viau si te hi tu teh vakin an ngaisang lem lo.

Hetiang mi ai chuan mahni thawhchhuah ngei ring, mahnia intodelh thei, hun awl nei tam thei lo khawpa hna thawk nasa te hian ngaihsan an hlawh daih zawk a. Thiltihna kawng hrang hrangah pawh an rintlak daih zawk a, rin pawh an hlawh zawk thin reng a. ‘Inti’ engemaw deuhte hi chu veng khat/khaw khat parawn an ni mawh viau.

Tunhmaa khawi lai dawrte emaw vela thu huang thin pawh hmuh tur an vang tawh viau mai a, hei pawh hi hmasawnna leh changkanna duhawm tak zinga tel ngei ngei tur chu a ni. Mahni ina chaw ei leh riahluh bak chu hmundanga theuleu mai mai sawi tur an tam thin viau a, mahse tunah chuan a dan a dang tawh hle.

Zingah tlai deuhah an tho a, tukthuan ei zawh veleh hmanhmawh deuhin an chhuak a, dawrteah an thu leh mai mai a. An ril a tam hunah ei tur ngaihtuahin inah an haw leh a, an ei zawhah dawrte lampang bawk an pan leh a. Zanriah ei dawnah an haw a, an eikhamah chhuahna tur bawk an zawng leh a. Chhungte mut hnuah an haw leh a, tih tur nei em em lo pawhin zankhaw tairek thleng thleng an meng leh reng bawk a.

Hetiang hrim hrima nula tlangvalin hun an hman chuan tu tan mah a pawi lo, anmahni tan a pawi ber. Rin tur an neih loh hunah engtin tak awm ang maw? Tam tak hi chu an hmabak a eng vak bik lo maithei. Mahni kea ding thei tur pawha hma la peih tlat lo chu kawppui atan pawh an duhawm vakin a rinawm loh. ‘Mami, i bialpa chuan enge a tih thin a?’ ‘Eng vak mah, a nu leh pain sorkar hna an thawk a, amah chuan bike a nei..’ Innghahna tlak ni tak maw?

Mahni phak ang tawk hna thawk ila, kan hnathawh chu eng pawh ni rawh se, lungawi taka mahni hna thawh hi a pawimawh a. ‘Hna hnuaihnung’ hi a awm thei lo hrim hrim a, chuvangin, eng hna pawh i thawk a nih a, i hna kha rinawm taka i thawh phawt chuan i hna kha a hnuaihnung lo tihna a ni mai. Mahni hnathawha lungawi tum lo, inthlahdah deuha thawk thinte hi an khawngaihthlak a, an ngeiawm duh viau bawk.

Taima takin mahni hmaa hna awm chu thawh mai tur a ni a, hlawh lak dawn pawha inthlahrung hauh loa lak ngam tluka hlu a awm lo. Duhdah deuha thil tih puat puat te hi chin loh a tha viau bawk a, hlawh chauh duh, thawk tha peih si lo tih ang chi hi thalai tan lek phei chuan nih duh hauh loh tur a ni.

Hlawh kan duh a nih chuan tih tak zetna thinlung pu chunga hna chu thawh mai tur a ni mai a, a nih loh chuan tih loh law law a, hlawh pawh lak loh ngam a fuh zawkin ka hre thin. Min chhawrtute tana rintlak leh rin ngam nih kha a pawimawh a, chutiang tur chuan thahnem pawh ngaih deuh chu a ngai thin a. Hah deuh mah ila, nakin zelah kan tan a lo tha zawk a ni tih chu a lang ngei ngei thin tih hriat a tha.

Confucius chuan ‘I nuam tih zawng tak hna thawk la, i dam chhung zawngin nikhat pawh hna i thawk dawn lo a ni mai’ a ti. Mahni nuam tih zawng hna thawk ni na na na a hna thawk dawn lo nih leh chu a inhmeh lo viauin a lang a, mahse a sawi tum tak zawk chu, kan nuam tih zawng tak hna kan thawh phawt chuan rilru hahdam takin kan awm reng thei dawn a ni tih lampang a ni daih. Mahni nuam tih zawng chu tumahin kan hmachhawn hreh lo chu a nih hi.

Benjamin Franklin pawhin ‘Hnathawk thin mihring chu mi hlim tak a ni thin a, hnathawk ngai lo bawk hi khawvel hrehawm ti thinte chu an ni’ a lo ti bawk a. Anne Frank pawhin ‘Thatchhiatna hi ngainatawm viau mahse, hnathawh hian lungawina min pe zawk thin’ a ti bawk.

Brad Henry chuan, ‘Nangmah inringtawk la, engkim a fel duak mai ang. I theihna te ring tawk la, rim takin thawk la, engmah tih theih loh i nei ngai lo ang’ a ti bawk.

Khawvela milar leh miropui tia kan sawi thinte hi engmah ti loa rawn lar emaw, rawn ropui emaw an ni hauh lo tih hriat a tha. Rim takin an thawk a, theihtawp an chhuahna zara lar leh ropui an ni a. Hnathawh hi an ngainep ngai lo mai ni loin, an ngaisang hliah hliah zawk a ni.

Mi tam tak chu tlema vantlang chung deuh nia an inhriat avangin hnathawh mai bakah thil hrang hrangah zah tur an ngah thei hle a, hei hi changkanna dik a ni hauh lo.

Hman zana Tribal Beats judge, Tribal Power frontman OPA thusawi kha ka bengah a ri ring hle mai. “Mizoramah celebrity kan awm lo,” a ti mauh mai. Mizo zingah ‘celebrity’ tia sawi tur thlang chhuak dawn ta ila, amah OPA hi thlan chhuah hmasak zinga tel awm tak a ni a, mahse ‘celebrity’ kan la awm loh thu sawituah a tang tlat.

Chutah, “Intihlar tak avanga bus ah pawh chuang duh lo an awm tih an sawi thin a, hetiang hi nih ve loh tur,” tih sawi telin, tunlai Mizo hmeichhe zinga zaithiam ber tih theih hial Zoramchhani pawhin ar a vulh a, arsa a zuar thin tih te a sawi tel bawk a. Tin, mipa zaithiam Joseph Zaihmingthanga’n gas bur a pu lai thlalak te pawh thawkkhat lai khan hmuh tur a awm bawk. An fakawm a, an entawntlak tak meuh meuh.

A ni lah taka, ‘inlak’ deuh vanga zah tur hre lutuk hi chu chhawr tlak an tam lem lo viau. Heng mite hian changkang emaw an inti viau a, mahse mipangngai mitah chuan khawvela changkang lo ber berte an ni tlat thung. Eng kawngah pawh mi inthlahdah leh zelthelte chu an ding chhuak ngai lo tih hre thar leh ang u.