SMS hmangin tawng kan suasam

    Mobile phone in min chiah hneh ta hle mai a, chitin chitangin kan nei fur tawh hlawm a. Tleirawl pawh la hre lem lo te thlengin khawilo kalnaah mobile phone an hum far tawh mai a. Hetiang taka kan leklam ta hi changkannain a ken tel chu ni tho mahse fuh lohna a nei nual mai.
    Kawng hrang hrang chu sawi lem lo ila, ka ngaihpawimawh berte zinga mi, SMS inthawnna vela tawngkam an hmang uluk ta lo lutuk hi ka vei em avangin heti lam chauh hi thlur bik ngaiin ka hria.
    SMS inthawn hi a biaka inbiak kher ai chuan kan hmang tlanglawn ber zawk niin a lang a. An thu chhut dan tam tak hi chu chhiar a harsa nek nek hle mai!! Min rawn thawn tam tak hi chu a awmzia ka hriat thin loh avangin min rawn thawntu hnenah 'Ka chhiar thiam lo' tih ka thawnlet fo reng a.
    Hetiang kan ching hi a tha lo em em mai a, kan rilruah ngaihsamna te, thatchhiatna te, inthlahdahna te chu zawi zawiin a tuh chho zel a. Hun a kal zel phei chuan Mizo tawng hi kan suasam nasa lutuk dawn niin a lang tlat. Tun vut vutah chuan a thleng thut kher lo a ni thei a; mahse, tam takah chuan a langchhuak tan tawh tlat si. Mizo tawng thiam chiang chiah si lo, tawng dang thiam em em si loah kan chhuak ang tih a hlauhawm ka ti.
    Thalai tam zawk tawngkam hman hi kan chik ve thin a nih chuan dik chiah lo deuh hi a tam ta hle mai a. Hengte pawh hi SMS thawn duhdahin a nghawng zinga pakhat niin a ngaih theih ka hria a. Tuna ho deuha lang hi nakinah chuan buaipui tham zawng a la ni ngei ngei dawn a, chuvangin thlir liam mai mai chi niin ka hre tlat lo.
    'Ek n ceh reg rigwt mai', 'mdag in mn gak, k cyg thei toh lo', 'lug a leg th m my', 'thln hnah ka rn t ve dn', 'k hw twh dn a' tih ang chi te hi Mizo tawng ziak dan tur a ni lo chiang khawp mai a. Hetiang SMS hmang hian kan tawng kan suasam nasa mah mah deuh zawng a ni. Theihtawpa humhalhtu tur zawkin hetianga kan sawp retheih zel chuan kum tam a liam hmain kan mumal lo nuaih tawh mai ang.
    Pangngai taka SMS inthawn hi thil harsa leh hahthlak a ni lo a, kei ngei pawh hi SMS hmang nasa em em mai ka ni a, tawngkam pangngaia kan hman ang thlap thlapin ka thawn thin. A dik taka thu inthawn avanga hunin a daih tak loh emaw chu an awm ka ring hauh lo a, an phone a chhiat phah emaw, an kut a nat phah emaw pawh ka ring hek lo. Chuvangin, hetianga tih hi chu inthlahdah vang te, thatchhiat vang te a ni berin a lang.
    Keini Mizo te bak hi 'Mizo tawng' humhalh tur kan awm tawh chuang lo a, hei hi hriain SMS a ni emaw, nitina midang kan biaknaah emaw pawh ni se, tawngkam pangngai kan neih hi hmang hram hram ila a duhawm khawp mai.