KA INKHEL VE THIN

Inrinni a rawn inher chhuak a, tukthuan kan ei zawh kha chuan rilruah thildang a lang tawh lo, 'Khawi field ah nge kan kal ang?' tih te, 'Tu te nen nge kan inkhelh ang?' tih te kha a lian em em tawh mai thin.

Khatiang hunlai vel kha chuan tunlai angin kaihruaitu tha pawh kan nei lo, TV ah duh duh huna inkhel en tur pawh a awm hek lo. Mahni tui tui khan kan tui ve em em mai a, nilenga kan inkhelh pawhin kan hah thei meuh thin lo. Tunah erawh pen thum kan pen hlek a, kan thaw hluam hluam zel tawh mai chu a nih hi!

Club kan din:
A 'sangkhat zakua' ang zawngin ka hre ta chiah lo a, kan thianzahoin Football club kan din ve a, kan phur thei khawp mai a. Sikul chawlh leh hun awl dangah te kan inhlawh thin a, kan pawisa hlawhte chu kan dahtha zel a, kan thianpa pa Calcutta zin tumin jersey leh mawza set kan chah a. A rawn hawn a, chhun pachangah kan ha chhin a, kawngpuiah kan inkhelhpui nghal ngei bawk a, a va han nuam tak e aw! A hunlai kha chuan kha aia ropui kha a awm bik chuang lo ang.

Club han din meuh chuan rilruah a tla na khawp mai a. Ka la hriat reng pakhat chu, kan thianpa Hruaitluanga te khan video player an nei a, video cassette hawhnaah kan kal a, Tottenham club video kha kan hawh a, an training lai kha kan en a, an tih vel dan kha kan han by-heart deuh ngei a. Kha video kan en avang khan kan thiam belh em em erawh ka hre lawi si lo.

Kan inchuh:
Member kan pung ve zel a, Inrinni kha chuan nileng deuhthawin kan inkhel thin a, a nei remchang apiangin kan inchuh tur an rawn keng a. Cup, Shield, Comics tih vel te kha a ni nuk hlawm a. Vawikhat chu kan thianpa, chatuan ram min pansan tawh, Lalrochama khan ama ar vulh lai a rawn ru chhuak a, High Field ah kan kal a, mi an lo tam em avangin Armed Veng field lam kan pan leh a.

Armed Veng atangin team 2 an rawn tel a, entry fee Rs. 30/- ve ve an rawn thehlut a. Anni team 2 chu kan inkhelh hmasak tir a, a chak zawk chu keini team chuan kan hmachhawn ve leh a. Inkhelh tan atanga rei vak loah 3-0 in hma kan hruai nghal a, kan phur khawp mai a. Ar kan hawn leh theih dawn bakah Rs. 60/- kan neih belh lehnghal!

Kan tumpuite chuan an zia an rawn chhuah ta tak tak a, hun a tawp meuh chuan 6-3 ngawtin min han lehthal leh ta a nih kha! Ar chu kan hawn thei ta lo a, mahse Rs. 60/- kha kan la chang ta tho a. Electric Veng atanga Zarkawt panna step sira vai thingpui dawrah thingpui kan in a, kan pawisa pawh chu kan hmang zo nghal vek a. Kan inkhelh laia ruahsur nasa vanga kan berh vek kha in kan thlenpui langsar zual chu a ni deuh mai.

'Kopang hisap':
Khatiang lai vela kan inkhelh tamna ber chu tuna Aizawl West Joint YMA Field hi a ni a, kha'nglai vel kha chuan Public Playground tih a ni thin a. Treasury Square bus stand opposite chiahah sawn field siamthat dan tur milem lian deuh mai an tar reng thin a, mahse khatiang ang kha chuan tun thlengin an la siam ta lo chu a nih hi.
Public Playground ah khelhna kan chan loh chuan a bul deuh chiaha awm, K.M. High School field ah khan kan khel mai zel a. He field hi a lian lutuk lo a, mahse nuam ti tak chuan kan khel ve zel tho a.

Field ko chhak lampangah chuan leivung tla khawm hi a awm a, tlan lawn nuam tawk vel hian hmun 4/5 velah a awm hlawm a. Kan han inkhelh tui tak tak hi chuan kopang lamah chuan ball kan tlan lawnpui nasa thei hle mai a, kopang lamah kha chuan 'out' kha a awm ve tlat lo.

Keini aia rual u deuhte khan 'kopang hisap' kha an thiam riau lehnghal a, kopang an pet per a, ball rawn let leh kha anmahni bawkin an lo dawng leh a, an khingpuite kha an bum phah fo mai a. A then chuan anmahni leh anmahni 'through ball' inpekna remchangah an hmang fo bawk a. 'Kopang hisap' tactic hmang thiam deuhte kha chu kan va han ngaisang thei tak aw!

Kawngpui field:
Sikul banah kan inthlak a, kan chhehchhawl thawmhnaw nen kan tlan chhuak leh nghal a, kan kawmchhak kawngpuiah kan inkhel thin a. Beetar a rawn lar chho a, kawngpuia inkhelhna atan khan a tha khawp mai a, bun a nuam a, mahse a peh hma fu bawk sia. Ka Beetar pawh kha thuina a tam hman thei khawp mai, khawl la pangngai te, thirzai te kha a inpawlh nuk zel. Beetar nei, peh ve miah lo kha chu tlema naupang chut, rual pawl lem loah kan ngai chu a ni ber.

Kan football boot mawlh mai kha:
Football boot chi hrang deuh kha a awm chuang lo a, duh thlan theih vak pawh a ni lo. Inkhel thin kha chuan 'Ch. Sing/Singh' (A sipel pawh ka hre lo) kha kan bun deuh vek ringawt mai a. A inanlohna chu a then a hlui deuh a, a then a la thar deuh tih a ni mai. A tifai peih deuh an awm a, tifai peih vak lo ta kha chu a khawro thei viau.

A hling kha thing ania, a savun lah kha a khawng duh khawp mai a. A hling a ral deuh tawh chuan a kilhna perek kha a rawn tlang thin a, kehnuai a na duh khawp mai. Kan thiam ang angin perek hmawr zum lai kha chu kan chhu kawi a, a ziaawm phah ve deuh thin.

Kan han inkhel a, chirhdiak velah kan tlanlut a, a tuk vela boot huh a ro leh chiah kha chuan khawng tha thei tak a ni. Inkhelh dawnah te tuiin kan chiah zawi hmasa te te thin. Lei char deuha tlan phei chuan boot chauh ni loin keimahni pawh kha kan khawng tel ta emaw tih mai tur a ni.

Football chauh lo pawh:
Kan thinlungah football kha a ropui fal hle a, mahse infiamna dang pawh kan tikual ve nual tho a. Hockey hi ka khel tam lo khawp mai a, Pu Saizela te kawta mau zung suih chawp leh a ball pawh chaihchun suih mum chawp hmanga kan inkhelh thin kha ka hun hnuhnung chu a ni deuh mai a. Hockey stick pangngai kha pakhat chu ka nei ve hman a, rei pawh ka nei hman lo, ka vaw tliak zui ta daih lehnghal!

Badminton lamah kan lut leh a, kan kawmchhakah khatih laia PWD SDO hi a awm a, an kawt kha badminton court leng turin an lai zawl a, alkatra hi an chhung a, chutah chuan chhunah leh zanah kan inkhel ve thin a. Ni sa em em mahse nileng pawhin badminton kha kan khel peih tho nia!

Tunah chuan...:
Inkhelh kha nuam kan ti ve hrim hrim a ni mai a, thlen san vak kha kan rilruah a lang pha lo khawp mai. Tin, khatiang hunlai kha chuan mahni veng aiawha khelh theih bak kha chu awm thei hian kan ngai lem lo a ni ber.


Tunlaiah chuan thil a danglam zo ta a, India rama club lian ber berah te pawh Mizo an tel ve ta nuk mai a, hmasawnna hi a zuanin a zuang a tih loh theih loh.

Thalaite tan infiamna hi eizawnna tlak a ni tawh tak tak a, bul tanna pawh a tha tawh teh narawh e! Coach tha tak tak kaihhruaina hnuaiah an inzir tan a, an hmalam hun hi a eng tawh viau mai a. Keini, mahni duh dan dana khel ve tawp, thianzaho zinga a dawihzep deuh leh tlaw deuh chu goalkeeper ni tura ngai ringawt thin te nen chuan inanglo tak kan ni.

Hetiang tak hian thil a awlsam tawh a, thalaite tan chuan tih tak zetna thinlung neih a pawimawh a. Keini anga ti vel mai mai loin thahnemngai takin, hlawhtling ngei ngei tura tih nachang hria se ka lo ti rilru ve mai mai thin.